恒指真係長升長有，上星期五最高升到去24978點，距離25000點關口，只相差22點；10月份期指仲升到過25050點。
年初已經開口中
如果恒指今日會見兩萬五，除咗一眾有貨喺手嘅散戶高興之外，你估城中仲有邊個會興奮到開香檳呢？華華估應該係賭王。話說今年年頭，賭王何鴻燊已經出嚟話，恒指未來9個月會升穿兩萬五。嗱，風水佬呃你十年八年，賭王話9個月見兩萬五，就真係9月見兩萬五。估唔到賭王除咗係「政治預言家」，喺財經金融界一樣咁神機妙算。
你以為賭王靠估亂吹？華華睇番當日恒指雖然紅盤高開，但只係啱啱升穿兩萬點。嗌到咁大，呢啲就係賭王本色，學嘢喇。雖然後尾佢改咗口，將目標日期推後到年底，但恒指如果今日真係到兩萬五，咁賭王就中jackpot嘞！
其實，大孖沙當中，除咗賭王有預測過恒指走勢，香港股神李兆基，同佢老友彤叔鄭裕彤都有估過。
四叔3月時畀咗個貼士股民，話恒指18000點可入市，22000點就要小心。到6月恒指臨近22000點時，佢仲提醒股民減持，果然個多月後，個市就出現調整。
到咗上個月中，佢見超人李嘉誠話中港股市位高勢危，反而忍唔住出嚟撐港股，調整預測目標，話年底前可升破25000，仲叫人趁低吸納。四叔撐港股，老友記彤叔就梗係要和唱，齊齊睇二萬五！
四叔彤叔慢一步
雖然，四叔同賭王都貼中恒指見兩萬五，不過，睇番日子，賭王年初時已經貼9月見兩萬五，當時恒指仲係兩萬鬆啲，但四叔同彤叔就係呢兩個月先貼，恒指都升到兩萬三。所以，呢鋪賭王贏晒！
[email protected]
大孖沙貼恒指
邊個講：何鴻燊
幾時講：今年1月2日
當時恒指幾點：20310
當時預測：未來9個月可破25000點
邊個講：李兆基
幾時講：今年8月24日
當時恒指幾點：22921
當時預測：年底見25000
邊個講：鄭裕彤
幾時講：今年9月7日
當時恒指幾點：23982
當時預測：年內可望升上25000