我布魯圖出嚟Wet咗咁耐，有乜大車未揸過？不過朋友話我溫柔但我很醜，若然揸架大車周圍去，霸氣洋溢得太緊要，肯定冇女敢埋身！咁啱俾我遇到豐田新返嗰部Porte；私家車咁嘅Size，內櫳卻大到拍得住七人車咁闊落，加上趟門式設計，我哋布魯圖一家上落車都冇咁易出洋相喇！咁難得有架細車啱我，嗱嗱臨揸架Porte載愛黎詩遊車河、順便示埋愛先！
記者：黎頌詩
攝影：陳偉強
演出：Tony、Karie
（InternationalChile）
可以點塞？
係人都知，我布魯圖無時無刻都想佔有愛黎詩，究竟點樣先係將佢據為己有嘅最佳方法呢……
（以下情節涉及暴力，各位讀者切勿認真）
方法１
司機位旁塞得落
呢架Porte，司機位旁座位嘅滑坑特長，可以將座位完全推向後，騰出嚟嘅空位，最啱擺啲好緊要、要時刻昅到實嘅嘢啦。
方法2
尾廂見使有變化
司機位旁同後排椅背都可拉低，放又長又大嘅嘢都夠位，即使唔搞咁多嘢，尾廂都好見使，大大件行李都塞得落，都係呢度好，無咁揚。
方法3
內櫳變大夠你碌
都係唔可以委屈我嘅愛黎斯，一於拉起後排，再推前駕駛席旁座椅，變出最大空間，咁就周圍碌都夠位啦！咦，我咪可以……
超級Size都咁嘆
喂，醒吓啦！查實只係布魯圖坐得太舒服，發吓白日夢咁啫，不過內櫳真係好闊落，後排坐兩個超級大肥佬都冇問題。
電趟門上落易
C記平日都鍾意睇吓啲設計趣致古怪嘅車，但就真係好少見到有Porte個樣咁可愛，方形車頭，不過角位線條就全部圓碌碌，好似一對大眼睛嘅長方形頭燈亦係一樣風格，最特別係同車身同色嘅粗直欄柵幼長鬼面罩，加埋下方同形狀的入風口，成個車頭就似足隻眼鼻口都有齊嘅小動物，睇落仲好似識笑咁。側睇身軀相當小巧，可愛度不減，有乜辦法唔令人一見嗒糖愛到死。不過，唔好以為佢主力賣可愛，佢嘅最大特色，係一對電動趟門，Porte據說就係意大利文「門」嘅意思。有乜咁巴閉？一個字──大！一趟開，足足有1,265mm×1,020mm，加上地台夠低，座位又可靈活移動，上人上貨都咁方便，直頭正過貨Van啦！
Echo底盤容量大
一上車，即時發覺車都唔可以淨係睇外表，因為內櫳嘅空間感真係叫人有啲意外。由於採用同廠Echo底盤，加上內櫳精簡化，所以唔單止車頂夠高，連前後排嘅距離亦少有咁闊，唔好話係我哋嘅超級噸位肥哥哥，即使搵個MBA球員嚟做乘客，都肯定無頂頂！另一樣C記最Buy嘅係車內儲物空間，夠多樣化之餘，設計亦好貼心，你簡直以為個車身係雪櫃門，最服係連插遮位都有埋！仲未夠，駕駛席旁嘅座椅重可變身成餐枱，有時都會喺車上開餐嘅我都真係未諗過。
冇大力菜唔夠力
坐上司機位，又有新發現，原來大隻佬都係做乘客比較好，因為司機位實在唔算闊落，身形肥大啲都咪話唔辛苦，當然C記呢類細粒女子坐落就綽綽有餘。咦，原來係用軚波，以前喺外國揀小貨車嘅Feel即時返晒嚟，型！再睇真錶板同中控台，設計幾特別，錶板並唔係喺軚盤前方，而係同旁邊嘅操控介面同屏幕組成一個圓形，同軚盤相呼應。好，畀油出發，起動都算暢順，有埋車尾視像，更有安全感。1,496c.c.嘅引擎帶嚟嘅力量屬中規中矩，裝晒成車大隻佬乘客嘅話，應該會有啲吃力。再掟埋個彎，唔……都係收收油穩陣。整體嚟講，呢架車仔嘅性能同佢嘅外在形象都幾統一，易操控，但唔屬力量型。
TOY0TAPorte規格
引擎：1,496c.c.VVT-i
馬力：109ps/6,000rpm
扭力：14.4kgm/4,200rpm
傳動：4前速自動波
售價：$159,000
查詢：富利堡（28776700）