有才子導演之稱嘅姜文，前日聯同周韵同房祖名去油麻地一戲院宣傳佢哋部新戲《太陽照常升起》，並同觀眾分享拍呢部戲嘅感受。呢部戲喺後日上映，而李安部《色，戒》就喺下星期三（26日）上映，兩部戲打正對台，問姜文有冇壓力，佢以普通話表示：「沒有呀，沒有所謂。」
大讚演得出色
姜文嘅脾氣一向都唔係太好，好容易就發火，前日有記者問佢係咪因為套戲係英皇投資，所以佢至搵房祖名演出時，佢登時無名火起黑晒面話：「不明白，為甚麼不可以找房祖名演出，他未拍這部戲之前已認識他，我覺得他很適合這部戲的角色，所以透過英皇找他演出，他是一個好好的演員，做得十分出色。」佢講完之後，仲不時重申唔明點解唔畀房祖名做，搞到現場氣氛好尷尬，及後轉移話題問佢嚟緊有乜計劃時，姜文就有啲寸咁話：「未想。」
至於房祖名被問到有冇壓力時，佢話：「完全冇壓力，呢部戲唔係注重香港市場，唔係商業片，係文藝片，文藝片係比較吃虧啲，不過入場嘅觀眾睇完會有驚喜。」問到係咪佢露股嗰場戲，佢就笑話唔係。
