港股升到爆燈，恒指逼近25000點大關，下一個目標係25500至26000點，藍籌同國企繼續發力，唞咗好耐嘅三四線股，亦會接力而上。博大堆，揀有實力同落後嘅股仔，短期間會有三至四成斬獲。
今日推介上海証大（755），呢隻係內地嘅中小型地產股，近期公司頻頻有大動作，管理層好明顯係想公司升級，由「中小型」提升到「中型」，日後再逐步升級至「大型」。管理層有大志，公司前景可加分。
証大基地在上海，其他發展項目分別位於江蘇省海門市、吉林、長春、成都同揚州等地，擁有土儲近400萬平方米。個多月前，進軍環渤海經濟圈發展河北省中科廊科技谷的地產業務，令集團土儲增加100萬平方米。
到上月初，証大再加強上海的發展項目組合，以4.65億元收購浦東「恒升名邸」的綜合商住項目，總地盤面積1.2萬平方米，總樓面面積6.3萬平方米，06年動工，現接近封頂。
增加土儲加快發展
「恒升名邸」包括一幢有兩層商場的17層高酒店，以及兩幢18層高、首層用作商業用途的住宅樓宇，另有兩層地庫，用作娛樂休閒設施及停車場，整個項目明年中前可落成，提供售樓及租金收益。
証大轉型做地產5年，現時已躋身「中型」發展商之列，成長迅速，06年度（12月年結）獲利2.3億元，升14%，每股盈利4.6仙，今年有更多物業落成，盈利可再增。
集團目前發展中的8個項目，4個已開盤，銷售理想，其中上海的五道口金融中心已全幢售予長榮航空，估計07年盈利可達3億元，08年可再上升至3.8億元，每股盈利6.1仙，以中型內地房產股合理的15倍PE計，証大一年目標價91仙。3年後，樓面15萬平方米、位於浦東的「新天地」落成，租金收入將大幅上升。
証大上周五收52仙，在前高位水平整固，一升破54仙阻力，確認調整完成，升浪再起，短線目標係7月底高位67仙。