朋友一共有七姊妹，仲要係七個樣貌似到不得了但性情就完全南轅北轍，不止一次聽過Uncle、Auntie投訴七個寶貝女麻煩腌尖又眼角高，由細到大都未試過可以一次過滿足到佢哋幾姊妹嘅Standard。難得最近聽到Auntie話七個人同時SayYes開心到暈，心諗邊個男仔咁有魅力𠱁掂幾位大小姐咁巴閉，搞清楚先知唔係一個人而係一部車！因咩解究令七位腌尖腥悶嘅大小姐齊聲讚好呢？
記者：梁美甜
攝影：譚盈傑
演出：Peggie
大家姐 空間大啱掃貨
大家姐天生就有最強掃貨戰鬥力，隨時碌爆幾張卡當等閒，不過當然係佢男朋友啲卡啦！以前大家姐就抱怨次次掃貨都要預架車擺唔擺得落，𠵱家新款X5裝咗第三排椅都可以摺合收埋係踏板下面，完全無阻尾廂空間，單係行李容積都有620-1,750公升，拍得住部貨Van嘅尾廂，擺咩都得啦！若果唔裝第三排椅，踏板下面仲多90公升置物空間㖭，有咁大彈性，梗啱晒Shopping狂大家姐啦！
二妹 外形cool爆
二家姐咩都要型，鍾意扮潮又鍾意擺款，根本就係七姊妹入面最腌尖嗰個，難得佢居然睇得上新款X5。望真啲又明嘅，事關X5身形龐大得嚟一啲都唔笨重；車身腰線設計仲由前輪圈開始，劃過車側門把後再向上伸展到車尾尾燈同行李箱蓋，線條流暢分明，令X5看來年輕兼充滿爆炸力。若然尾燈設計可以再修改一下，唔好同之前車款咁似就更得二家姐歡心喇！
三妹 豪華舒服啱懶人
三家姐較為懶散，出街至怕皮硬車震兼逼狹，坐都唔舒服就莫講話瞌眼瞓。好彩全新X5重新調校過四輪懸掛，表現軟硬兼備，唔彈唔跳夠穩定。前後三排真皮座椅夠晒舒服，陳設亦相當豪華，中控台頂設i-Drive資訊屏幕，錶板四周仲鑲有桃木配飾，三幅式真皮軚環附設多功能按鈕同恒溫冷氣等一應俱全，喺車度開住冷氣聽音樂，舒適度隨時同屋企張床有得比。
四妹 坐齊七個雞啄唔斷
四妹同五妹不嬲都鍾意熱鬧，兩姊妹仲無時無刻都可以講唔停，全新X5七座比上一代闊落，而且就算額外加多二萬蚊，添置第三排座椅成七人車，尾排兩個座位相比奧廸Q7和富豪XC90仍然闊落，七姊妹坐齊都唔逼。興之所至，去郊外野餐又或遠足都得，七座位坐晒七個人都仲有個尾裝食物同戶外用品，必要時可以放置到車頂個原裝行李架度都仲得，啱晒愛熱鬧又成日鬧個不停嘅兩姊妹。之不過車身太高對年紀大又或者小朋友嚟講，上落就唔係好方便，起碼要加多個腳踏至可以上落車。
五妹 多間隔擺零食一流
五妹一向為食，成日食唔停，所以總會放一兩包零食喺袋以備不時之需，最怕係坐長途車唔知點安撫呢位刁蠻小姐。幸好X5前中後座都有置物位，前座手枕位更大到放得落十包薯片都仲有位剩，絕對夠為食又刁蠻嘅五妹坐足一日，唔怕會停口冇嘢食。
六妹 大大啖吸新鮮空氣
六妹成日話坐車侷促兼唔環保，新款X5有個標準版Panorama天幕式玻璃頂，車廂開揚兼有空間感。六妹注重環保，鍾意3公升版比4.8公升頂級版明顯耗油低好多，慳油又環保，仲話272匹馬力喺城市代步絕對夠用；就算去郊區，HDC陡坡緩降系統與xDrive智慧型可變四輪傳動系統，跑山一樣冇問題。
七妹 愛飆追風講速度
七妹絕對係幾姊妹中最大膽但又最講安全的一個。寶馬將新款X5定性為SAV（SportsActivityVehicle），擺明車馬係跑格四驅車，雖然入門版採用新一代3公升直6引擎，但馬力有成272匹，一啲都唔弱。車身較重，但引擎低、中轉扭力輸出夠，操控感相當之好。
最叫七妹情有獨鍾係X5嘅懸掛同xDrive四驅系統，快捷嘅轉向反應、循迹表現及駕駛感都好有跑車Feel，0至100km/s都只係8.1秒！快還快，新一代BMWX5亦具備CBC彎道煞車控制系統、含四大延伸功能嘅DSC動態穩定控制系統、ADB-X智慧限滑差速系統、HDC陡坡緩降系統同埋xDrive智慧型可變四輪傳動系統等，安全性夠全面，啱晒愛飆又要安全嘅七妹啦！
寶馬X53.0si規格
引擎：2,996c.c.直6
馬力：272ps/6,650rpm
扭力：32.1kgm/2,750rpm
傳動：6前速+/-自動波
查詢：寶馬香港（27145271）