同股神畢菲特食餐晏，問吓投資心得，舊年拍賣價484萬港銀。至於想同索羅斯一齊創辦量子基金嘅「商品大王」羅杰斯食個dinner，又要幾銀？
上個周末，羅杰斯應邀到廣州出席廣東省最大規模嘅「金葵花．南都財金論壇」，先喺廣州花園酒店舉行演講午餐會，主題係《今日世界投資機會》，門券分3800、3000同1800人仔。原本600個位，臨時要加多200個先夠坐。
到咗呢個禮拜五就係戲肉，羅杰斯會同一位幸運兒喺北京長城飯店共晉晚餐，至於係邊個，就睇淘寶網上競投結果，底價18888人仔，價高者得，仲可以帶兩位親朋出席。競投活動由《北青傳媒》搞，上個禮拜五開始投標，但噚晚七點幾，華華都未見有人出價。
羅杰斯係中國大好友，曾經搵咗個華人保母，教囡囡「樂樂」普通話，嚟到廣州繼續唱好內地股市。據《新浪財經》報道，羅杰斯演講時話，99年只買入大陸股票，從冇賣出過，因為對大陸股市有信心，但要小心正喺泡沫初期，升得太快未必好。
難得一見投資大師，大家最想梗係攞貼士，點知羅杰斯話揀股票好似揀女人：「我唔可以話你知我揀邊個，點揀由自己決定，世界上有太多好女人喇。」不過佢都畀咗啲啓示，話如想喺未來5至10年賺更多錢，最理想就係投資原材料、商品同自然資源，不愧為「商品大王」。