上禮拜五花旗股市先跌後升，升幅雖然唔大，但係喺低位反彈上嚟嘅幅度都唔細，技術上算係偏好。
花旗股市插落嚟係因為英國有間按揭銀行唔掂，呢間行喺英國排三大，正正當當做按揭生意，冇做次按，呢次出事係因為借錢畀佢嘅行家收緊銀根，原因好清楚，𠵱家風高浪急，銀行為求自保，留多啲錢喺身邊，好正常，但係咁樣又會累到其他行家，呢啲就係信貸危機嘅火燒連環船。英倫銀行已經出手相助，問題會唔會惡化就要睇有幾多間銀行出現相同嘅問題。
花旗聯儲局明日議息，個個睇實會唔會減息，港股上禮拜五逼近25000關，再升啲有可能會整固吓先，新批QDII嘅錢最快呢個禮拜落嚟，國企股應該唔憂冇得炒，人行加息嘅幅度細，負面影響唔大。
國壽C輪9074：國壽（2628）上禮拜五報收38元，自從先排升上38.90元之後，最有睇頭都係呢次，破39元，短線睇45元，耐少少應該可以迫向50元，可以買啲國壽C輪9074，𠵱家造90仙，槓桿率4.2倍（有效3.7倍），對冲值0.88，正股升上45元，9074應該喺1.55元樓上，正股跌穿35.80元止蝕。