華華收到風，下個禮拜舉行投資者推介會嘅「羽絨王」波司登，諗住搞搞新意思，唔好淨係present咁dry，搵咗近年冒起嘅中國超模周樵行場catwalk，等人唔好以為羽絨都係大大件，着到人成隻糭咁，其實佢哋嘅出品都可以着得好靚嘅！
講開周樵呢位國產名模，洋名Queenie，有「四川鍾楚紅」之稱，今年29歲，生於四川成都，高178公分（約5呎10吋），天生一副衣架身材。若果大家有日日睇娛樂版，又或者睇過「血爾口服液」嘅廣告，應該見過佢。
除咗搞catwalk，華華上個禮拜喺中環仲見到波司登嘅燈箱廣告，一大班模特兒着住佢哋嘅產品，好開心咁喺度玩雪。
對於生長喺亞熱帶地區嘅華華嚟講，真係完全感受唔到玩雪嘅開心；不過，若果大家見到張廣告，咪當提早過白色聖誕囉！