美元持續下跌造就金價急升，近日金礦股發力，其中紫金礦業（2899）可算長升長有，上月大跌市時曾低見4.08元，唔使1個月已經升近10元，短時間內淨賺近倍半，勁得過份。
不過金礦股唔係隻隻都得，如早前發出盈警的靈寶黃金（3330），就在金價狂升之下，中期業績反而大幅倒退71%。業績倒退主因是佔總生產成本逾80%的原料價格上升，導致毛利下跌，靈寶自有金礦蘊藏不多，是業績倒退死因。
至於噚日急起直追嘅招金礦業（1818），黃金開採業務佔總收入達8成，僅兩成來自冶煉業務，而且招金繼今年6月向其母公司收購西峽招金、托里招金及甘肅天昊餘下權益後，還有更多注資醞釀當中，參考紫金升勢，追落後金礦股招金係首選。
永成改名前爆上
近年頗多上市公司轉型搞油，因為石油有價，不過大多喺國外搞油，例如高信（007）去到埃及搞油，智富能源（1051）就去到馬達加斯加，噚日股價見異動嘅永成國際（850），係少數能夠喺國內取得採油牌照嘅民營上市公司。
石油係戰略資源，外商好難參與，永成得以獲批牌照，主要原因係公司開發的納米驅油劑可以大幅提高油井開採能力，甚至枯井都可以進行第2次開採，唔係其他上市公司可以攞得到嘅商機。
據永成管理層講，該公司於齊齊哈爾油田開採的10口井，目前已成功安裝了6台抽油機，其中兩口井亦已完成射孔噴油，料最快9月中可投產，而所提出的油將會內銷至當地的原油廠。油井投產加上快將改名為「中油資源控股」，相信係炒上理由之一，噚日大成交爆上，應該仲有水位。