首次在劇集《與敵同行》中演奸角的郭晉安，前日在九龍城一大廈天台拍攝挾持商天娥的戲份，商的兒子鄭嘉穎趕往營救，鄭跟郭互相糾纏毆打，但娥姐最後為救兒子，被安仔插了一刀。日前因拍劇而導致左腳膝蓋韌帶撕裂的鄭嘉穎，表示傷勢要兩星期才可康復，令稍後有場要孭起商天娥行樓梯的戲份不知如何是好，擔心影響拍攝進度。
郭晉安、鄭嘉穎、蒙嘉慧及商天娥前日在九龍城一大廈天台拍攝劇集《與敵同行》，劇情講述飾演壞人的郭晉安，挾持了鄭的母親商天娥，並將她雙手綁起，而鄭嘉穎及蒙嘉慧往天台營救對方，其間鄭嘉穎同郭晉安互相糾纏毆打，二人均血流披面，郭晉安欲將鄭嘉穎推落樓不成，反而自己失足墮樓，原本前日郭晉安要吊威吔拍攝墮樓戲份，但最終由替身上陣。
危險動作買定保險
鄭嘉穎昨日不用埋位時要持枴杖到場，事緣日前他拍攝一場追車跑落草地斜路的鏡頭時，突然跣腳扭傷左腳膝頭，導致韌帶撕裂，問及他傷勢如何，他說：「好彩今日大部份嘅戲都係瞓喺度俾人打，我有睇西醫同跌打，不過跌打話我要兩個禮拜至好似正常咁行。出事後去將軍澳醫院睇醫生，啲護士同番我講我右腳都因為拍劇扭親，我自己都唔記得，反而啲護士記得。」他還透露稍後有一場戲是要他孭起商天娥行樓梯，但現腳傷未好，故他也不知如何是好。
對於有指他日前赴台灣拍攝月曆時，勁擦無綫高層樂易玲，嘉穎聞言說：「冇乜特別感覺，次次係咁，都唔真實。」
首次扮演壞人的郭晉安，原本要吊威吔，問他可有購買保險，他說：「我有買3、4份保險，其實我自己都有受傷，左手手臂嘅骨撞到，不過自己冇睇醫生。」問他拍攝危險動作有否向太太歐倩怡滙報，他表示：「我唔講畀佢知，等拍完先講佢知，費事佢擔心，不過我每次拍完都有同佢講，唔想佢睇電視先睇到。」
此外，商天娥被郭晉安綁起雙手，她笑言不是太辛苦，她說：「因為我都只係用個口叫吓『唔好呀。』但最後我都有為救嘉穎用背脊幫佢擋一刀。」
採訪：王崇穎 攝影：陳慧安
