在過去一兩年，好多內房股升幅都以倍計，越秀投資（123）股價仲徘徊在2字頭，大落後同偏低，確係好吸引。
大落後股只要有實力，遲早會收復失地。大市噚日大跌近300點，越投就逆流而上，最高2.79元，收2.71元，升0.22元，升幅8.8%，創出10年來新高。越投股東百忍成金，終有吐氣揚眉一日，不過，千祈唔好貪小利而走大寶，越投升勢只係剛剛起步，後市仲有排去。
越投同中國海外（688）都係老牌的內房股，中國海外近一兩年升勢之勁，令股民津津樂道，越投相比，仲係落後好遠。
先睇06年底，中國海外股價10.33元，噚日收17.20元，升66.5%。越投同期股價由2.167元升上2.71元，升幅僅25%。
再睇05年底，中國海外3.135元，現時升幅係448%；越投05年底0.688元，升幅僅293.8%。
越投升幅冇可能追得貼中國海外，但有可能追近一點，計番兩者升幅差距的中位數，越投即使上升370%，股價已可見3.25元，即係仲有20%的上升空間。
土儲成本低
越投係廣東省級企業，擁有地產、公路及紙業。集團現有土地儲備5800萬平方呎，大部份在廣州，係以前以低價買入，以目前市價計，升值已好可觀。
越投土儲每平方呎成本不用200元，而廣州現時的地價平均每方呎已超過500元，全部土儲的實值可增加174億元，平均每股越投增值2.55元，單係土儲增值之數，已幾乎係成間公司嘅市值。
另外，越投持有51%的越秀交通（1052），以及40.8%的越秀房地產基金（405），增值之數未計在內；仲有，分拆新聞紙業務上市，時機一成熟，對股價又會有刺激。
越投調整一日即再起升浪，並衝破7月底的高位2.66元，成交3.85億股，亦創出年半以來高紀錄，以突破旗形的量度升幅計，短期上升目標3.10元。