噚日賣地，華華當然要去湊熱鬧。雖然話地產商餓地，但人哋都識計數，點會吓吓都赤膊上陣同你搶，正所謂「你有張良計，我有過牆梯」，近年唔少發展商投地，都以組合出擊，實行聯手壓價買地。
聯手壓價刺激度大減
不過，對於華華呢啲塘邊鶴嚟講，家陣睇賣地就冇以前咁過癮，因為唔知係咪發展商聯手投地，所以競投過程唔似得以前咁激、咁好睇！
好似噚日拍賣嗰幅大埔白石角地皮，明眼人一睇就知，信置志在必得，點知黃志祥晨早就同老拍檔嘉華呂志和、南豐蔡宏興打晒招呼、握晒手，大家有地齊齊拍。
對手少咗，賣地過程自然慢，當南豐分別承咗第6、11及16口價之後，成場靜晒，其他發展商又無咩出價舉動，搞到拍賣官三度發出「溫馨提示」──喂喂，家吓出價未達底價要求，再冇人舉牌，政府收番塊哋㗎喇！
講開拍賣官，你以為佢攞住個槌扑幾吓，就幾十億咁幫政府扑啲錢返嚟，查實做拍賣官一啲都唔易，除咗成日要整啲「溫馨提示」提吓大家出價，仲要一眼關七。
拍賣官也接溫馨提示
好似噚日咁，大部份大孖沙黐埋一堆，坐晒喺拍賣官嘅右手邊，畀你係拍賣官都牛咁眼望住右邊，費事好似早輪有次拍賣，蝦碌睇唔到有人舉牌就扑槌，搞到庫房少咗收入。
不過人算不如天算，點估到有個揸2號牌嘅神秘人，坐喺拍賣官嘅左手邊，佢舉牌準備承第35口價44.5億元時，拍賣官啱啱將注意力放咗喺右手邊，睇佢唔到，搞到拍賣官要人畀返個「溫馨提示」，相當無癮。
鐵欄劃禁區玩謝記者
噚日，賣地之前，文化中心方面為咗維持秩序，同埋保障準備入場嘅發展商安全起見，喺場內架起晒鐵欄，將正中心劃咗做禁區，剩得左右兩條路仔，畀喺現場數以十計嘅記者採訪。
發展商、大孖沙身嬌肉貴，梗係要顧住佢哋安全，但就難為華華班行家，當有發展商喺另一邊出現時，成班記者就要兜大圈過對面，兩頭走索晒氣，場面要幾混亂有幾混亂。
近幾次賣地，場內都多咗班稀客，除咗環保團體，噚日就有班浸大嘅學生哥嚟捧場，喺尖沙嘴文化中心睇賣地，了解香港樓市。
場外追訪仲好睇
不過，華華相信記者喺場外見發展商就追嘅場面，肯定好睇過賣地場上，等極冇人舉牌嘅悶場。
[email protected]