受馬主丁邀請，到君悅酒店參加獅子會午餐，學吓人唱「獅歌」，獅子會每次午餐，例牌搵藉口叫獅兄獅妹捐錢，由負責紀律之獅兄負責。律師M叫各人捐錢，有個好藉口，佢話：「我哋應該守紀律，永不遲到。我今日遲到咗幾分鐘，理應受罰，其他遲過我嘅獅兄獅妹（凡女士都年輕過自己啦），都要罰！」其實律師M老早到場，只係遲過主席啫，邊算遲到呀。捐錢做善事，冇人有異議，好多會友自動奉獻紅底一至兩張，皆大歡喜，佢哋遲啲會搞一個千人宴，在中文大學新亞書院舉行，千人宴要賣餐券，全場費用以往有獅兄贊助，籌得款項相信可以益吓啲學生哥。
與左丁山同係嘉賓嘅係馬術Y，佢到目前為止係香港唯一取得資格參加○八年傷殘奧運會馬術賽嘅騎士，與佢講起騎馬，知道初學者容易跌落馬，容易傷及筋骨。另一位嘉賓醫生K係骨科專家，離開公共醫療後，自立門戶。醫生K話：「騎馬係我哋一個客源，但滑雪帶來更多生意。我參加過一啲骨科訓練班，學校所在地就係冬季滑雪勝地，學滑雪而跌傷者，比比皆是，故此一間訓練學校因利乘便，設於滑雪區！」醫生K故此勸告朋友唔好去滑雪，左丁山係庸俗之人，笑醫生K「自斷米路」！
香港骨科醫生好出名，水準極高，經常到內地贈醫施藥，為偏遠地方窮人做骨科矯正手術，名之為「關懷行動」，由骨科老前輩梁秉中教授主持，當今民政事務局局長曾德成一直係「關懷行動」董事，直至今年六月底之前先至辭職。香港醫生關懷內哋，到內哋做白內障手術嘅有林順潮教授等，做兔唇手術嘅有「微笑行動」。左丁山儍儍地，某次問一位老友醫生：「點解內哋有咁多病人等待緊骨科創傷、白內障、兔唇等手術呢？」呢位老友答得直接：「因為呢三樣嘢唔死得人，內哋醫療資源極度缺乏，人手不足，故此醫療注重內科，疫症等可以致死嘅病症。馬蹄足喎，白內障喎，兔唇喎，咪等吓先囉！」哦，原來如此，至於呢類病症點樣影響一個人嘅成長與自信心，等有心人研究吓嘞。」