中國財政部嘅特別國債已經陸續喺內地發行，作為中國投資有限公司（簡稱中投，前稱國家外滙投資公司）嘅資金。呢家中投公司肩負重任，除咗幫國家打理多餘嘅外滙儲備，仲會喺境外做投資，媲美新加坡嘅淡馬錫。
上個禮拜，內地傳媒不斷傳出中投公司即將成立，仲有埋管理層名單，其中較為惹人注目嘅，係高盛嘅董事總經理胡祖六，傳聞話佢會做中投研究部總經理。大陸記者仲即時搵胡祖六回應，當時佢冇正面回答係咪會加盟，只係講咗對中投公司投資方向嘅睇法。
最新一期《財經》報道，中投嘅高層管理人員會由7人管理委員會構成，名單冇胡祖六個名，箇中內情，華華認為都幾耐人尋味。不過，《財經》話，中投公司嘅管理層薪金，並唔係同市場水平睇齊，唔通胡祖六見錢少，於是決定留番喺高盛？