西九文娛藝術區計劃，重新包裝，再次諮詢。呢次嘅主題，係「藝地分家」，放棄以前嘅大膽嘗試，回返香港人見慣見熟嘅經營模式，就係土地還土地拍賣，收入所得歸庫房，政府再撥款（一百九十億元）嚟興建核心文化設施，包括大型表演場地、大劇院、音樂廳、室內演奏廳、戲曲中心、中型劇院、黑盒劇場等，到咗第二期，還要興建一個大劇院、兩個中型劇院。
地產公司勾地、買地，在西九起屋，起酒店、商業大廈，將來有一個「西九管理局」負責監督興建文娛設施，究竟私人與公家如何協調？最令人擔心嘅係地產商各自起樓，設計與外形與其他樓宇不協調，整個西九嘅建築物群有如彌敦道，似一碟雜碎，咁就貽笑國際咯。如何保證西九區內嘅所有建築群，在佈局、外貌、顏色、方向、對流交通方面有相等質量及協同性，好考功夫，將來嘅西九管理局全權負責土地規劃，唔知有冇能力做得到。「西九管理局」代替咗以前嘅單一發展商成為整個西九嘅發展靈魂，獨攬大權，責任非同小可，都唔知可以搵到乜嘢人做，預料西九管理局董事會必有爭拗，加上立法會議員要加多一把聲，未必肯一次過撥款一百九十億元，先天決定呢個西九管理局做事冇效率、政治化，認真難搞。
最偷笑嘅就係地產商，西九有地可賣，直情係肥豬肉啦，買地起樓賣樓，簡單到極，地積比率低啲（將來係1.81倍），地皮價可以畀少啲。以前嘅方法係招標搵一個財團包攬晒，唔中標嘅財團完全冇份，故此為咗利益，一啲集團拚命反對，現在大家有機會分餅食，梗係開心啦。大財團方面，冇得單一中標亦唔緊要，反正甩咗營運西九文娛藝術呢個虧本包袱，一身鬆晒，你估佢哋唔識得勾地投地乎。未來幾十年，「西九管理局」嘅營運如何，冇人可以預料，點樣搵到錢嚟支撐甚麼劇院、博物館，甚為頭痛，最後唯有攤大手板，向納稅人攞。