政治係眾人之事，卻唔係人人搞得掂，正所謂如果唔捱得熱，都係知難而退喺熱廚房行番出嚟，睇人煮到埋嚟等開飯算嘞。陳太決定參選躍上立法會呢個政治舞台，可見佢係抵得熱之人。噚日佢出席一個廚具義賣活動，好多女士見到廚具就母性大發「上身」，陳太都唔例外，八方見佢一到場就「掃貨」，買咗套2,800蚊嘅廚具，又擸咗一批杯碟、幾把鑊鏟，滿載而歸。
咪以為陳太貪平至瘋狂入貨，其實陳太係主辦義賣嘅「小燭光危疾援助基金」名譽贊助人，佢出錢出力都係做善事，幫助冇錢醫病嘅人，機構仲會不時舉辦唔同類型嘅活動，推廣公眾健康同埋增強病患者嘅自我照顧能力。陳太話平時都有下廚，所以買廚具好實用，最撚手係洋葱鴨同白汁焗飯，佢話好多朋友試過都話好味，至於陳生就最鍾意食西式牛扒。陳太果然係入得廚房，出得議事堂嘅女強人。
睇阿蘇專欄學煮餸
陳太又同八方講，佢平日好鍾意睇壹傳媒旗下嘅《飲食男女》，「因為（本雜誌）入邊會教人煮啲新穎嘅餸菜，甚至有啲係自己做開嘅，如果本雜誌提出嘅烹調方法更加好，煮出嚟更加好味道，我都會嘗試吓㗎！」《飲食男女》有個由蘇施黃教煮餸嘅專欄「FollowSo」，專教整簡單家常菜，原來陳太係阿蘇擁躉，期期捧場。
講到咁好味，可惜噚日時間有限，陳太冇即場示範整番幾味，八方冇機會試到佢手勢。應邀做嘉賓嘅肥媽MariaCordero就表演煮一味「香煎白鱔片」，肥媽喺台上示範時傳授煮海鮮秘方，佢話只要加啲檸檬汁，咁就會好似「賣魚佬冲凉」咁，即係「乜腥味都冇」，喺台下嘅陳太好似學到嘢咁，忍唔住咔一聲笑咗出嚟。八方問肥媽支持陳太定葉太，佢走江湖多年，講咗個同佢煮味餸一樣咁「鱔」嘅答案，話兩個都支持，因為兩個都係阿太，都會幫女人喎。
憑教煮餸成名嘅乜太物太好受歡迎，如果陳太有機會露番兩手烹飪功夫，相信吸到唔少師奶票，先嚟一碟簡簡單單嘅「清蒸勞醫生」，再嚟「大炒掃把頭」，最後搵全港市民一齊煽風點火，上埋主菜「焗實煲呔2012雙普選」，咁就功德圓滿，和味咯。