「鮑魚佬」成日笑容滿面，表面上大方親民，其實佢份人都幾小器。想當年佢同「蟹大俠」差不多同時期出道，但人哋一早上咗神枱位，做到𠵱家都孭飛做大俠，反而鮑魚佬就要做甘草，所以佢一直唔忿氣。直到早排靠部爭身家人氣劇《佛跳牆》殺出一條血路後，佢覺得自己不知幾咁吐氣揚眉，咁啱佢呢期同公司傾緊續約，咪乘機同公司講數，誓要攞番個男主角獎。
不過鮑魚佬講完之後，完全冇人理，雖則鮑魚佬今年係幾好成績，但佢都幾十歲人，老人安慰獎畀佢就冇問題，公司要畀男主角獎，都畀佢戲中個仔「低低地」啦，聽聞低低地今年仲係超級大熱人選，極有機會跑出，如果鮑魚佬真係食白果，眼光光睇住個仔攞獎，肯定激到嘔血。
Textby關仁
