最近寫「迷失東京」與「急吃無情趣」，談及東京酒店，因下筆為文以簡單快捷為原則，單憑記憶，事後發現有幾處疏漏。一位讀者（AliceandEdward）大概係東京專家，來信逐項指責，質問左丁山：「老作，呃稿費，側側膊」。
有錯就要認，講「鎖你」。但如果因此而大罵左丁山老作兼側側膊，未免言過其甚。好嘞，經過呢次教訓，左丁山以後去每處地方，會攞埋咭片，寫稿時照抄詳細地址，以免再俾人鬧。
經與肥仔K講電話之後，逐項改正：（一）椿山莊四季酒店在文京區目白台，不是春山莊四季酒店在目白區。（二）ParkHyatt嘅日本餐廳Kozue在四十樓，不是三十九樓。（三）新宿壽司清在伊勢丹會館三樓，不是在伊勢丹六樓。（當晚左丁山食完壽司，再上六樓食火鍋，故此記錯咗）。
「迷失東京」講完，按下不表。另一位讀者Michelle來電郵話以前左丁山講過朋友夫妻減肥方法，再問一次。其實左丁山對如何減肥並無研究，Michelle問跑步可否消減肚腩，點答呢？以常識講，任何運動，只要持之有恒，每日做三十分鐘至一個鐘頭，都有助於減肥，不過五十歲女性開始每日跑步三十分鐘，或有風險，唔該Michelle問吓醫生先。股票分析師K每日中午到健身室，係有牌健身教練，佢嘅腰圍只有二十八吋，令所有分析師羨慕不已，一次同分析師K同枱吃飯，左丁山問佢如何可以減肥，K老哥話：「中年人每日步行好過跑步，而且無論跑步或步行，都要以平地跑，平地行為主要，記住上斜路傷心臟，落斜路傷膝頭。你每日多啲在平地行路，每晚行半個小時，係咁行啦。」
前星期，一本美國雜誌報道最新治膝手術，內容講到美國babyboomers已經五、六十歲，做膝頭手術嘅人口大增，其中一個原因係呢一代人比較愛好運動、跑步，故此與上一代人比較，babyboomers（嬰兒潮一代，最老嘅係六十一歲）嘅心臟病少咗，但膝頭唔掂嘅個案激增！中年人跑步太多，慎防膝頭負荷不了。