建業（216）呢隻老牌港資企業，絕對冷門，但呢期港資同祖國地產股，都炒到飛起，建業有得諗。建業重秤前NAV2.6元，股價（1.12元）折讓已經有57%，一啲唔弱。集團家陣透過漢國（160）揸住唔少中環優質物業，又喺廣州及深圳市擁有多幅靚地，應佔樓面達到750萬平方呎。計計數，呢批土儲當佢呎價只係升值200元，NAV增值15億銀，建業應佔權益增值，講緊7.9億銀，每股增值1.43元，單計增值，已超過建業現價。
建業NAV秤到上4蚊，NAV折讓上到72%，呢個折讓水位，吸引到爆。再講，漢國已經計劃喺08年度（3月底止），逐步推售內地樓盤，部份樓盤更可望在明年中落成，即係話，唔使好耐，土儲價值可以釋放，建業母憑子貴。以建業現價係咁意翻半番計數，股價見1.68元，到時，建業NAV折讓仲有58%，大把向上空間。
看通短炒睇1元
看通（1059）由大奇迹日（8月17號）見底到家陣，幾乎重返今年高位，走勢似足大藍籌，無他，以看通現價0.84元計，預期07年度（6月底止）PE，都係5倍單位數。再講，看通大股東當中，仲包括上實集團，揸住看通11%，有實力雄厚嘅紅籌企業做投資者，自然聯想多多。呢轉短打，博看通見1字頭，潛在回報率近20%，有魚有肉。