吳文忻自從去年成為整容代言人後，對自己的容貌已十分滿意，對於之前王賢誌爆無綫要求藝員整容，雖然無綫加以否認，但昨日吳文忻自爆當年選美之後，因鼻太高且勾，被無綫監製李添勝要求整容。
吳文忻昨日一身性感低胸裝，於西九龍中心擔任「變靚D」宣傳活動司儀，對於早前王賢誌大爆無綫要求藝員整容一事，吳文忻謂真有其事，她說：「我98年選完港姐之後，劇集《碧血劍》嘅監製李添勝搵我去試鏡，佢叫我去整整個鼻，話我個鼻太高同勾。嗰時自己太細個，所以接受唔到整容，所以我支持王賢誌咁講。」
「嗰時接受唔到」
吳文忻自言在娛樂圈打滾多年，對整容有另一番看法，她說：「不過𠵱家諗番起都啱嘅，咁觀眾係睇你上鏡個樣，唔係睇真人，所以做少少修飾係應該，只係嗰時細個，真係接受唔到。」最終她失去在《碧血劍》的演出機會，由佘詩曼演出。問吳文忻可有後悔當年未有整容？她說：「又唔可以咁講，嗰時冇去做，𠵱家去做都未遲，咁我哋藝人係靠個面口搵飯食，修飾吓覺得冇乜問題，咁做都只係敬業樂業。」
「扮女俠好奇怪」
昨日本報就此事致電無綫監製李添勝，對於當年要求吳文忻整容，他直認不諱說：「咁佢個鼻比較勾，如果拍古裝劇，扮古典美人做女俠係好奇怪，拍時裝劇就冇乜所謂，我都只係一片好心，畀啲意見佢，叫佢磨一磨鼻骨，等佢舒服啲。」
採訪：王崇穎 攝影：葉君海
