古巨基剛完成在順德舉行的巡迴個唱匆匆返港，昨日他到將軍澳新都城出席《Moments》簽唱會暨環保創作展。司儀Monique問基仔童年時有何環保玩意，他說：「我哋細個好興玩『東南西北冷飯菜汁睇吓邊個最鹹濕』，係用紙摺成嘅，我都唔明點解要係『睇吓邊個最鹹濕』，可能押韻啩。」
期望再開演唱會
隨後大會安排基仔參觀由中學生設計的新發明，試玩足球場機械人時，他不慎弄脫幾顆螺絲，故參觀水底機械人時，遭Monique取笑道：「你唔好又整甩人哋粒螺絲喎！」
基仔又在台上教fans跳機械人舞，不過fans舞姿很嚇人，他笑道：「你哋好似晨早6點去公園耍太極咁！」提到基仔新碟，他說：「隻碟銷量接近白金，好開心，好期待個唱開partII，咁就完美喇！」談到不慎弄脫螺絲，他笑說：「個小朋友去到我心口咁高，已經設計機械人，我嗰陣淨係識玩『東南西北睇吓邊個最鹹濕』！」
至於同門師妹Theresa則在元朗廣場舉行《MyCupOfT》簽唱會，雖然場地較小，但仍吸引數百fans擠滿商場。Theresa以性感示人，在台上挺胸趷pat扭腰兼踢腿，現場反應熱烈。Theresa說：「今次係第二次舉行簽唱會，上次太緊張甩嘴，今次仲係第一次着咁嘅衫跳舞，因為動作好大，我已經戴咗兩個tube、黐晒膠紙防走光。」
與祖兒情深對話
Theresa和容祖兒（Joey）均先後與何韻詩傳緋聞，日前有報道指Theresa與Joey同場形同陌路，Theresa解釋說：「我同Joey唔係好熟，見到面唔會尷尬，嗰日我哋根本冇正面見到，後嚟佢又做緊訪問，下次見到我會同佢情深對話。」談到何韻詩與助手傳緋聞，Theresa說：「應該唔會喇。」Theresa又謂兩人近來多靠msn聯絡，更約定買對方大碟互相支持。
採訪：吳佩思
攝影：陳俊強
