自從《魔戒》（LordoftheRings）同《哈利波特》（HarryPotter）系列全球大收，荷李活對開拍魔幻片簡直樂此不疲，食正中秋檔嘅《魔幻星塵》（Stardust），講男主角為咗討好心儀對象，不惜打生打死追尋從天而降嘅星星，從中令佢領悟到乜嘢至係真愛，套片仲有好多耀眼巨星做大配角，好似米雪菲花（MichellePfeiffer）化千年老妝嘅特技就已經夠晒睇頭。 撰文：戶川淳
本月26號上映嘅《魔幻星塵》，有祖廸羅（JudeLaw）前女友施安娜美娜（SiennaMiller）扮演貪慕虛榮、冷若冰霜嘅大美人，簡直為佢度身訂做。男主角查理葛斯（CharlieCox）為咗贏得夢中女神芳心，不惜答應去到已被禁止進入嘅神秘國度，攞一粒從天上跌落嚟嘅星星，後來先至發現星星係由嘉露兒丹絲（ClaireDanes）扮演嘅精靈幻化而成。
震撼女巫裝
原來世上仲有好多唔同嘅人，為咗唔同目的要得到嘉露兒丹絲，男主角喺旅途中除咗要奮力求生，仲要面對唔同試煉，到旅程嘅終點，佢先至發現嘉露兒至係自己嘅真愛。
《魔幻星塵》雖然好似係食魔幻片熱潮嘅水尾之作，但套片早排喺美國上映仍好評如潮，呢部帶點點色情同暴力嘅成人童話，不乏大卡士助陣，包括有憑搞笑歌舞片《戀愛大爆髮》（Hairspray）而鹹魚翻生嘅米雪菲花，佢飾演嘅千年巫婆冷迷亞出場嗰陣，化咗一個嚇人嘅特技醜裝，後來先回復美貌，為咗化呢個5,000歲女巫裝，仲要用成四個半鐘先搞掂，不過效果都幾震撼㗎！
羅拔變同志
同米雪大鬥演技嘅仲有一大班資深演員，其中以羅拔狄尼路（RobertDeNiro）扮演嘅「飛天魔盜王」莎翁船長就最出位，佢表面殘暴兇悍，但內裏極愛文學又貪靚，仲係一個男同志㖭！另外今年飲恨金像獎影帝寶座嘅74歲老戲骨彼德奧圖（PeterO'Toole）在片中扮演國王，至於擔任旁白嘅都來頭不小，就係《魔戒》「白袍巫師」伊恩麥凱倫（IanMcKellan）。
話你知：原作者有來頭
《魔幻星塵》改編自暢銷作家尼爾蓋曼（NeilGaiman圖）嘅同名小說，該小說曾獲得魔幻文學大獎。原本作者唔想將故事搬上大銀幕，不過佢被導演MatthewVaughn嘅創意同誠意打動至肯答應。
尼爾蓋曼來頭唔小，佢係英國作家，作品包括奇幻、科幻、恐怖小說，甚至有兒童故事、繪本、漫畫同報紙專欄等，亦編過電影劇本。搬上大銀幕嘅作品包括《魔面迷宮》（MirrorMask）、《TheReckoning》同《Neverwhere》等。安琪蓮娜祖莉（AngelinaJolie）與《阿甘正傳》（ForrestGump）導演羅拔湛米基斯（RobertZemeckis）合作嘅魔幻新片《魔戰王：貝奧武夫》（Beowulf），都係由佢編寫劇本。