苗僑偉（三哥）和鄧萃雯在電視劇《歲月風雲》中飾演離婚夫婦，兩位演技派由戲裏鬥到戲外，互不相讓。日前兩人接受本報專訪，雯女大彈三哥拍完床上戲後草草了事，全無浪漫感覺可言；三哥也不甘示弱大爆雯女不時如妃上身，演戲過了火位，甚至形容雯女出道時給人「玩玩吓」感覺，氣得雯女面色一變，並忿忿不平地反駁道：「我一向都有帶個腦返工！」 撰文：戴彩煥
在無綫劇集《歲月風雲》中，鄧萃雯飾演的汪紹芬，因為難忍苗僑偉（三哥）飾演的華文碩生性風流，向三哥提出離婚，改投伍衞國飾演的危天行懷抱；然而，二人離婚後察覺到仍深愛着對方，在三哥幾番努力追求下，雯女最終與三哥和好如初，大團圓結局。
雯女眼神太凌厲
雯女與三哥這對鬥氣寃家雖然首次合作，但二人戲裏戲外卻出奇合拍，雯女除了與三哥在演戲上互相交流意見外，日前她更找三哥傳授打保齡秘技，只可惜三哥越想在「老婆大人」面前顯威風，就越是頻頻打波落坑，可謂老貓燒鬚。
究竟在三哥心目中，雯女是怎樣的一個對手？三哥說：「佢好認真、好專業，認真到迫住你交功課，一開始就捉住我要傾兩公婆點相處點交流，佢一向畀觀眾覺得佢係一個好叻好強嘅女人，我有時會叫佢收啲、唔好咁有火、眼神唔好咁利。我份人比較直接啲，我知佢份人係咁認真，我又何須要轉彎拐角？佢眼神一凌厲，就會好惡咁樣，佢角色係千金小姐，嬌生慣養，眼神唔可以咁利，所以一畀我感覺到佢係如妃上身，我就會即刻同佢講：『唔好咁利，定啲定啲、慢啲慢啲，唔好咁勁！』始終我哋做戲有時會over！」
三哥親自揀靚女
那麼，在雯女心目中，三哥又是怎樣的一個老公？雯女竟老實不客氣地大彈三哥某方面「唔得」，雯女說：「華文碩同汪紹芬離婚之後，一路想追番我，佢個角色應該係好浪漫好識追女仔嘅人，但一拍嗰啲戲就睇穿佢唔得。女人對浪漫要求好高，你追女仔時講啲乜做啲乜、身體語言係點、有幾識電人，各樣都係一種浪漫手段，但三哥呢方面麻麻哋，有場戲講我哋飲醉酒之後好開心，跟住上咗床，三哥以為上咗床已經係喺番埋一齊，第二朝佢着番衫之後錫咗我一啖就走，其實劇情好夠，但我覺得佢唔夠花，做唔到嗰啲感覺畀我，我咪笑佢：『你係咪好耐冇搞過？』估唔到佢答我：『咁梗係啦！』」
被雯女大爆「媾女唔掂」兼「好耐冇搞」的三哥顯得十分尷尬，但仍力撐說：「唔可以咁講，每個人媾女嘅準則唔同。其實華文碩唔係好叻媾女，佢係俾女媾啫！」
雯女表示，劇中三哥是媾女王、情場聖手，所以跟他有一手的靚女們一定要高質素，如湯盈盈和楊秀惠等，原來拍攝前全部經過三哥親自揀選！對此三哥笑說：「我只係畀啲意見啫！」
雖然雯女認為三哥不夠浪漫，但卻大讚他是個非常有安全感的老公，雯女說：「三哥真係好似一個老公，佢高大威猛，好容易令人有小鳥依人嘅感覺，以前自己演嘅角色好硬淨、好女強人咁，但一企埋三哥身邊就會覺得好小鳥依人咁，反而謝天華就畀唔到一個老公嘅感覺我，佢（謝天華）唔係一個有leadership嘅人，可能大家係平輩，佢未必夠膽咁做，但三哥就令到我覺得自己真係似一個老婆，好耐都未試過有咁嘅感覺。佢好多嘢都話晒事，好照顧我同個女，令到大家覺得真係好似一家人咁。」
不忿被指玩玩吓
《歲》劇中飾演二人女兒的梁靖琪（Toby）被批評演技造作，三哥認為應該體諒新人：「今次係Toby第二部劇，對一個新人嚟講，應該有個包容空間，一個咁新嘅新人，點會做到揮灑自如？呢個係一個訓練過程，自己出道都俾前輩話，佢（雯女）初出道都畀人覺得佢玩玩吓啦。」
豈料雯女聞言即面色一變，不忿地反駁三哥：「唔知點解佢（三哥）會咁講，我從來都唔玩玩吓，我一向都有帶個腦返工！」
三哥沒料到隨便一句會引來雯女如此強烈的反應，遂笑着打圓場說：「我意思唔係玩玩吓，我意思即係受到外界好多批評，好似阿佘（佘詩曼）咁，初初都係受外界好多批評，每個人一定有個成長過程，最緊要嗰個新人係認真去做，何況Toby有個包袱喺背脊，係高層個女，佢自己都想做好啲，咁講對佢好唔公平，應該畀啲時間同機會佢。」
指導Toby點做戲
對於Toby，雯女表示也曾給予對方不少意見：「拍呢部劇前，我有約Toby傾偈，問佢諗住點做，佢有自己諗法，但聽完佢個模式之後，我畀咗啲更簡單嘅方法佢，叫佢唔使諗到咁複雜，譬如唔使set定去到邊個位就喊，因為一複雜就會變得好造作，我叫佢唔好諗咁多嗰日場戲嘅事，不如諗多啲點解爹哋媽咪咁錫你，諗吓自己係一個點嘅女仔……佢唔識睇中文，有啲嘢消化唔到，未必可以好生活化，所以有幾次佢冇份拍嗰幾場戲，我都叫佢返嚟，睇吓我同三哥點做，係一個點樣嘅爹哋媽咪，睇完之後佢咪會有個概念喺腦入面囉！」
攝影：陳志嵐
場地：SuperFunBowl、利寶閣
髮型：HairCulturebyMichaelLam（鄧萃雯）
服裝：鱷魚恤（苗僑偉）
單身實力派vs幸福楚留香
既然鄧萃雯和苗僑偉在演技方面各不相讓，十足鬥氣寃家，且看看他們各方面的成就，究竟最後誰勝誰負？
鄧萃雯（雯女）
年齡：41歲
入行經過：84年參加無綫藝員訓練班
婚姻狀況：未婚
真假情人：萬梓良、鄭敬基、江華、「有骨氣」老闆范展鵬
代表作：《金枝慾孽》
獎項：03、04年獲無綫我最喜愛實力非凡女藝員獎
苗僑偉（三哥）
年齡：49歲
入行經過：80年參加無綫藝員訓練班
婚姻狀況：妻子為戚美珍，育有一子一女
真假情人：戚美珍、梁靖琪（Toby）、吳美珩
代表作：《天師執位》、《楚留香之蝙蝠傳奇》
獎項：未有奪得香港電視獎項
資料來源：《蘋果》資料室
