「鋼琴王子」李雲廸噚日到觀塘apm出席新書《鋼琴王子李雲廸》及全新專輯《樂動柏林》發佈兼簽名會，女樂迷暈晒大浪。之前有傳「鋼琴王子」同台灣女友MichelleLin秘密訂婚，八方見佢臉龐圓潤咗唔少，梗係有愛情滋潤所以心廣體胖啦，有人問佢結婚傳聞時，佢表現愕然，「冇呀！我冇女友呀！」唔通佢同女友已經分手，王子就笑而不答，反應耐人尋味。
李雲廸新書講佢成長故事經歷，佢坦言細個時冇諗過自己會成為音樂家，以前最鍾意打兵乓波，更自言球技「蠻厲害」，甚至諗過加入國家隊㖭，不過最後佢放棄個波仔，揀咗彈鋼琴做終身事業，佢話每當自己唔開心時，只要彈奏莫札特嘅歌心情就會好好多。