趁人齊一次過講晒，恕不另行通知。
「不要在我身上貼sticker，任何情況之下。」
最怕參加那種產品宣傳活動，一進場不理三七廿一，一個sticker（當然是雞乸咁大個招牌）黐在你心口，然後推你去給記者影相——很「非人」的一種感受。
（我試過偷偷地中途撕掉，總是有人比我更狠，「嘩，你甩咗喎」，手起貼紙落，又貼上一個新的，再撕，再貼，陰魂不散。）
我來撐場，不代表你有權用我的身體賣廣告。在私人物業外牆亂貼街招尚且會被送官究治，何況人家身體髮膚？
禁止標貼
做乜你咁睇唔開？搞宣傳活動就是為了宣傳呀！
即係咁，呢個道理我當然明得好緊要，但我出席代表我願意讓你的party看起來很叠馬有面子，代表我不介意幫你做口耳相傳的口和耳之一，不代表我應承獻身做你的人肉廣告牌呀，大佬！
有些人以為來party的人都是貪曝光貪黐酒飲貪攞免費贈品的人，你貪得小便宜就預咗同我做番些少嘢，否則就不要來了。如果你真的這樣以為我，請早響，恕我的遊戲規則與閣下有些出入，我們打不成牌了。
收足錢收足禮我當然可以任你舞，不過那是工作，並非純粹出於支持的贈興。好嘞！也不要看得我那麼算死草，有時不核突的舉手之勞，甚至講心不講金地幫你免費宣傳吓其實也冇乜所謂，喂，但係唔該你唔好搞亂我個look吖！
我是那種出街前對着自己恤衫上那7粒鈕，究竟要「解3扣4」還是「解2扣5」都要斟酌半天的人，到最後有乜嘢准自己擺上身有乜嘢一定要拎走，問題梗係嚴重啦！而我來你的party，你粒聲唔出一個貼紙貼落嚟，一嘢破壞我苦心經營的構圖，也難怪我黑面吧？
你又有冇諗過有啲冷衫、皮革、PVC和珠片衫俾你黐完，搣番都會有個「汞」嘅先？嗱嗱嗱，我唔少件衫真係咁死法，唔係生安白造你㗎。
先不要爭論不讓貼sticker是我小器還是你要求太苛，心平氣和，講成效講格調吧。
就算我擺明代言某樣product，我都會反建議大會不黐貼紙而改用另一種東西──一個印滿logo的佈景backdrop其實夠有效了，而且較有型。你們不是想幫你們宣傳的嘉賓有型點嗎？
曼哈頓與荷李活也有很多商業贊助的活動呀，你有冇見過妮歌潔曼（NicoleKidman）件Dior露肩晚裝上貼着塊膏藥咁大的手機廣告？
醒吓啦！要幫你出的，就算貴寶號嘜頭在明星身後的牆紙上也會幫你出，不幫你出的，兜心口一個大商標也沒用，傳媒會cut到剩低嘉賓的面部特寫，甚至亁脆打上馬賽克，又試吓爆陰毒成個sticker貼上面吖笨，人哋夠可以直頭唔登咯。
我最聽汪明荃話，所以影大合照時從不專登做攝石人，「爭乜唧？人哋要影你自然會搵你出嚟影，唔影你企正中間都冇用！」
制服不誘惑
講咗咁耐你仍然沒共鳴？
OK，有沒有人嫌「開幕酒會」與「就職典禮」那些強迫嘉賓佩戴的襟花是醜樣的？有沒有人覺得朋友婚宴上兄弟姊妹硬性上身的一球梅蘭菊竹是核突的？有沒有人覺得本港各大音樂頒獎禮上，歌手們精心配搭的華衣美服與大會指定扣在當眼處的logo別針有點格格不入？
活動搞得好的話根本毋須靠那個變相sticker也能驗明正身，要讚要彈人家明查暗訪總是找得出你嗰壇是乜東東的，不如大方而有型地准許參與者有完全的個人化表現吧。我知，我知你們有時想講吓團隊精神，肉眼見得到的團隊精神如果對你來說有那麼重要，我還比較寧願全體參加者劃一地穿上阿公提供的制服。制服會誘惑點嗎？不一定，還得視乎話事人的眼光，看看到底那套uniform揀得靚唔靚。但就算唔靚，這一套擺明就是制服，起碼醜都唔關我事先吖！
曾蔭權出席澳洲悉尼舉行的亞太經合會議，穿上那件DrizaboneRidingCoat時，大概都有這樣想過吧？
本周貼紙
朋友今天專登上髮型屋set好個頭才和你去食飯，你會不會二話不說喺人哋頭頂插朵紅花？
但願今日之後要看的人都看到了，不要再在我身上亂黐sticker，不過天豈從人願？我覺得此文見街之後我身上多了個label才真──「麻煩」，不排除中間還有夾個粗口字的可能，而且最慘的，是個看不見撕不下你俾人貼了都唔知的sticker。
但喜歡時裝的人，應視此label為大紫荊勳章。
Textby黃偉文
