世上沒有不勞而獲的事，長青藝壇逾25載的劉德華，多年付出無數血汗，不時要勒緊肚皮過着冇味生活。大前晚華仔在南京舉行演唱會時，解開上衣大晒六嚿腹肌，46歲依然弗到漏油，冧得台下40,000名fans嗌破喉嚨，但其實他近10年來每逢開騷前，日食三餐均清淡到極，戒鹽戒油戒澱粉，靠飲價值5,000元一劑的名貴開聲茶補氣，一個月內速減10磅，速度快過不少纖體代言人。
劉德華大前晚在南京舉行第4場內地巡迴演唱會，現時他又身處常熟準備開騷，向來身形極弗的華仔在南京個唱中更見清減，全身近乎零脂肪，當他解開上衣在台上載歌載舞時，勁騷令人艷羨的六嚿腹肌，難怪台下fans忍不住瘋狂叫囂。
7時後禁食月減10磅
本月底踏入46歲的華仔，本身是個「肥底」人，當年他在無綫劇集《獵鷹》中稚氣未除，體重高達180磅，但隨着年紀漸長，華仔愈見清減，原因是他對飲食十分注意，尤其男人容易中年發福，要踢走肚腩相當困難，故身為天王的華仔為保持最佳狀態，既請健身教練學keepfit鍛煉腹肌，更要過着冇味人生，才能在萬千fans前展示肌肉。
據知華仔近10年來每逢開騷前一個月，便要開始守三戒，三餐戒鹽戒油戒澱粉，晚上7時後禁食，若肚餓則以水果充飢，加上他每日排舞5小時，運動量極大，一個月下來已由原來的155磅減至145磅。據知就連劉媽媽為兒子煲愛心靚湯，在華仔開騷前後的日子也一樣守戒，煲湯不加油鹽，肉類要起皮，貫徹清淡原則。
不過華仔在補身補氣方面另有秘方，原來他常飲中醫師所開的開聲茶，包括野生人參及冬蟲草等珍貴藥材，每劑價錢近5,000大元，可供三次服用，雖然價錢昂貴，但華仔覺得服後精神好，有補氣之效，故大多時候總有一壺開聲茶傍身。至於不用開騷做肌肉男的日子，華仔會如常飲食，但消夜可免則免，而吃晚餐時若開始有飽肚感覺，他會放低筷子休息一會，以免吃得過飽。
歌迷為見偶像撞爛門
近日瘦了10磅的華仔，不諱言因跳舞運動量大而瘦一圈，他說：「的確係瘦咗，因為每晚唱完頭三首歌，已經全身濕晒，到後台換衫時，化妝師都懶得為我補妝，因為唔使三秒，我啲汗又整溶個妝。」
其實華仔的fans也在網上留言，着他不要再瘦，華仔說：「我開騷後冇再節食，每日食足三餐，只係唔食消夜，呢次個騷舞蹈多，舞台又大，跑多兩個圈，乜都消耗晒，我覺得自己狀態好好，大家唔使擔心，唔會再瘦㗎啦。」
今次華仔在南京開騷前夕，本來要到場館排練，豈料因數百fans聞風而至，一名婦人更帶着孩子上台找華仔簽名，由於歌迷不肯散去，還撞破附近一間茶室的大門，大會保安認為情況混亂，着華仔取消綵排，延至翌天下午才排練，但晚上則已正式演出，事後華仔說：「南京嘅歌迷好熱情，我一邊唱，一邊見到山上有好多人衝入嚟，台邊兩側突然間迫滿觀眾，我唔知佢哋點入場，我只係擔心佢哋嘅安全，我會做好自己嘅表演，希望令每位入場睇嘅觀眾都開心。」結果華仔不負眾望，一騷靚肌，已令全場約40,000名fans叫不停。
撰文：林妃
新鮮肥仔變長青型仔
話你知：天王健康餐單
早餐：兩塊塗花生醬麵包、咖啡少糖
午餐：烚菜、烚肉（豬/雞/魚）或叉燒
下午茶：菠蘿包/奶油多
晚餐：烚菜、烚肉（豬/雞/魚）
消夜：水果（蘋果/西瓜/蜜瓜）
資料來源：劉德華
娛樂資料庫：男人40谷腹肌
本地娛樂圈除劉德華之外，其實不少男星年過40歲仍落力keepfit，令身形保持健美。
