隔牆有耳:賭王的一哥論 - 李八方

隔牆有耳:賭王的一哥論 - 李八方

澳門賭業風起雲湧,威尼斯人度假村噚日宣佈,新開張17日就有第100萬名遊客入場,其他賭場冇壓力講都冇人信啦,商務及經濟發展局局長馬時亨噚日都話,澳門多咗新賭場同酒店對本港旅遊業有一啲挑戰,財爺曾俊華仲為此搞咗個「腦震盪」會商討對策,佢遲啲會去澳門考察吓,不過香港唔會考慮起賭場。不過賭王何鴻燊面對眾多過江龍強敵,始終擺出冇有怕姿態,前晚佢同四太十指緊扣出席《風中少林》首演酒會,記者提起威尼斯人,賭王「牙擦擦」自誇「一哥」,「佢有佢犀利,我哋有經驗,佢喺拉斯維加斯就大晒,嚟到呢度都要叫我一聲大哥!」
四太聽到「一哥」咁講,好識做咁話,「西洋有西洋劍,我哋都有Chinese功夫!」夫唱婦隨好鬼合拍,至於識耍乜功夫,唔通係「耍太極」?賭王唔知講真定講笑,「我哋睇相都知,我係(空手道)黑帶嚟㗎,太太仲犀利,識起飛腳㖭。」佢話平時每日運動45分鐘,又日日游水,冬天照游,打風先唔落水,一個月打兩場網球,晚黑就同四太跳舞。

百家樂玩家視為福星

之不過使出Chinese功夫嘅始終係血肉之軀,擋唔擋得住西洋人嘅「銀彈」先!仲有半個月就係十一國慶黃金周,澳門各大賭場已備戰搶客,賭王使出嘅招數係「慈善百家樂大賽」,總獎金高達2,000萬元。據賭王講,百家樂呢種玩意由佢喺40幾年前首先引入澳門,佢更表示玩百家樂嘅人視佢為福星,「好多人都叫我九哥,皆因我喺屋企排第九,百家樂最大係九點,所以邊個人玩百家樂,見到我都咁開心。」總之大哥「阿一」係佢,九哥最大嗰點又係佢咁話。人哋愛因斯坦就有「相對論」,估唔到賭王都自創咗一個「一哥論」,不過就歪歪哋囉!
唔知係咪誓要保住「大哥」寶座,賭王早前出高價買入一張清朝皇帝「龍椅」,又買咗全球最大枕形鑽石,雙雙擺喺新葡京做鎮場之寶,佢話「慈善百家樂大賽」冠軍可以坐上「龍椅」影相㖭。澳門賭王呢個「寶座」,唔係買張「龍椅」、鑽石就坐得穩陣嘅,據八方了解,威尼斯人開張後,賭客貪新鮮,舊葡京客量應聲下跌兩成幾三成,賭王左右手、澳博營運總裁吳志誠比較老實,話「慈善百家樂大賽」跨越十一黃金周,應該可以吸引番啲客人。
賭王表面輕鬆,事關其他賭場迎戰國慶黃金周來勢洶洶,今個月28號金沙酒店就會開幕,請咗老牌組合AirSupply到濠江開騷,相信對唔少人好有吸引力,至於對正新葡京嘅永利酒店亦全速趕工,務求盡快開張搶客,賭王仲有乜新招,八方拭目以待。