有人說，這次港島區補選，寧願投票給空氣。
有得揀，至係老闆，我無興趣做老闆，但既然有得揀，無理由投空氣。
陳太去馬，對手是葉劉的話，我選陳太。假如陳太出選，葉劉棄選潛水，我輕輕呼吸兩啖夾雜停車唔熄匙的廢氣，照揀陳太。萬一陳太以家事為重，中途變卦，甘乃威臨危擔梯上馬，對撼葉劉，我更加要投甘一票。更離奇的對決是，陳太和葉劉雙雙忽然失蹤唔玩，只得勞永樂跟鍾樹根兩個直踩到尾，勉為其難，我會揀小器的勞永樂。因為小器唔同賤。再下來，黃毓民為陳太抬轎唔成，由他出戰程介南，唔使問，揀硬黃毓民。最惡劣的情況必須預計在內，就是當陳太反口唔選，民主派無人出陣，剩低葉國謙一支公對住葉劉做大戲，這種時刻，空氣裏只有一股死寂。到了政治生態這樣子肆意排放廢氣的絕望時侯，我們的選票，投入垃圾站算了。TMD選民的資格，即刻申請，永久中止。
立法局直選議席唔多，比例代表制又阻住民主普選發展的地球轉，我們能夠動用手上選票的機會七除八扣，點會浪費彈藥投空氣，講笑搵第二樣！唯一投空氣的歷史時刻也許有的，就是梁家傑vs曾蔭權那一戰，明知陪跑的梁家傑比陳太更放得下，民間團體叫市民去票站投票，選民不是那八百人，揀誰都一樣，都是嘥氣。