雖然有大師級專家叫人唔好買地產股，但係地產股仍然連日喪升，不論係炒減息、炒供求、炒負利率定係炒落後，大孖沙咁多錢去掃地產股，後市仍然可以睇高一線。
今年中推介過，認為係嚴重被低估的'AssetPlay'永安公司（289）昨公佈業績，純利大增近1倍至5.95億元，其中物業重估增值收益佔4.57億元，比上年同期的1.66元增加逾倍，反映其手上龐大的資產升值甚多。不計有關收益，核心經營溢利增長近4成至2.53億元，比上年同期增長7000萬元，反映零售業務也有可觀增長。
中期盈利每股2.015元，假如全年每股盈利有4元，其現年PE便降至3.5倍，事實上其往績PE僅7.4倍，也是低得出奇。雖然盈利中有唔少來自物業重估，並非現金收益，公司仍決定派發高息，除中期息由上年度18仙大增1/3至24仙之外，還派特別股息每股100仙，反映公司財政狀況非常充裕。
根據中期業績報告，派發100仙息是因為公司1907年成立百貨業務，慶祝成立100周年的特別關係而派發，果然係有特別理由。技術上永安剛升穿2月及7月的兩次高位阻力13.7元，如永安股價後抽回落至14元，不妨買番多少，唔係為咗收高息，而係在今次資產升值潮中，永安長期落後，其AssetPlay價值有排未反映。
股價折讓逾6成
以其6月底止每股NAV超過23元計，折讓高達6成，在資產減值周期已經算大，在升值周期下，更加唔可以接受。當日同時推介另一隻AssetPlay廖創興企業（194），近期股價完全冇跟過大市，又係炒落後之選，不過這兩股成交較疏落，只合中線持有。