好多美國人都唔鍾意自己份工，有啲不滿份工冇前途，或者太悶，但又擔心會被裁員。不過，美國全國民意研究中心（NORC）同芝加哥大學調查發現，86%美國人，其實幾鍾意自己份工。
Sharing喺《MSNBC討論區》話：「我份工叫『人生教練』（lifecoach），其實係顧問，專門幫人計劃未來事業、發揮潛能、控制情緒、克服人生困難、積極面對人生，份工好有意義。」
sickofthepres講：「我從事建築業，雖然份工好忙，但做得好開心，每日同班同事有講有笑，令我忘記日常生活煩憂。」
年紀越大越滿意
preacher1就呻：「我喺車行做營業員，工時好長，冇乜時間陪家人。咁都不特止，老闆希望員工假期都返工，佢自己就放假，同屋企人去湖邊嘆世界，真係唔公平！」
crazaybaba話：「過去26年，我喺半官方機構同私人機構打工，都算做得開心。早排攞咗個專業大獎，但上司唔賞識，令我好失望，於是劈炮唔撈。」
芝加哥大學調查顯示，一個人如果年紀越大、學歷越高，或者薪金越高，就會越鍾意自己份工；全職比兼職更滿意份工；白人比黑人更鍾意自己份工。72年至今，每年起碼有82%美國人，對份工感到滿意。