一度叱咤樓市嘅「豪宅大王」秦錦釗雖然未正式刑滿，但已經有東出再起動靜，廉署以佢涉及嘅信用狀騙案改編拍攝嘅劇集《廉政行動之億萬信用》今晚喺TVB播出，秦錦釗突然入稟控告金管局，據講又向TVB發律師信，指套劇有毀謗佢嘅成份，要求抽起。
道具要用靚嘢
呢單case誰勝誰負言之尚早，但已經令廉署同無綫好頭痕，因為劇集原定今晚10時半播出，秦錦釗出手令安排可能生變。廉署噚日表示仍未決定是否抽起唔播，最遲今日下晝拍板；無綫稱仍照原定節目表播出，至於有冇收過秦錦釗律師信則不予置評。據了解如果抽起呢集，會播另一集頂替。
究竟呢集「億萬信用」劇情有乜堅料，令「豪宅大王」咁緊張呢？八方向廉署中人打聽，冇得睇都聽吓古仔。佢哋話由於內容改編自案情，相信好多料人所共知，值得睇係勝在製作認真，事關由電影大導林超賢執導，飾演男主角嘅家英哥扮演有錢佬，導演要求道具要用靚嘢，廉署人員四出張羅，最終由廉署中人借出名貴雪茄同雪茄盒拍攝，飾演辯方律師嘅顧紀筠，就出動私伙鑽飾同名牌衫，務求似模似樣。八方噚日曾到秦錦釗旗下公司搵佢，但幾間公司唔係轉咗手就人去樓空，「豪宅大王」似乎未想現身。