英文《虎報》變成免費報紙，早上在中環可以攞到。未改版前，《虎報》以財經新聞為主，因為爆過一單國泰收購港龍嘅新聞，令到左丁山每日多訂一份報紙！九月十日拎起份免費《虎報》睇吓，咦，內容冇咁專注於財經，多咗其他內容，多咗好多彩色圖片，編排比以前更亁淨利落。真係奇，點解以前收錢，現在變成免費嘅報紙，竟然同時變得更靚呢？唔通以前反而冇咁好心機做靚張報紙？
免費《虎報》會唔會成功，畀《南華早報》一啲壓力，尚未可知。可知嘅就係，收費《虎報》少人買，免費《虎報》多人攞。有人攞就希望有人睇啦，讀者人數會增加嘅，至於英文廣告會唔會多啲，且看下回分解。
年青下一代少看報紙，似係不爭之事實，如果唔送畀佢哋睇，佢哋多數唔會自己買份。九月開始兩位老友不約而同，俾大學新聞系請咗去做兼職講師，教大學生如何採訪新聞。兩位第一日開學，就問大學生睇乜嘢報紙，點知答案係：好少睇報紙。兼職講師大吃一驚：「你哋讀新聞系，唔睇報紙？平時有冇留意新聞㗎！」答案係：睇電視，有時上網望吓報紙。兼職講師對左丁山講：「報紙搞乜鬼年輕化吖，大學生呢一代都唔睇報紙嘅。」為咗進一步求證，問吓中學教師吖。中學科語文教師回應：「邊有學生睇報紙㗎，學校訂咗啲報紙，鼓勵佢哋睇，都係睇娛樂版啫。」再問大學教授，教授話：「我都冇辦法勸到屋企位中學生睇報紙。」
我哋原來統統out晒，老嘢先至睇報紙。假假地，自己唔多唔少都靠呢行搵食，唔擔心就呃你。報紙迷與馬迷一樣，年紀日大，容乜易無以為繼？
兼職講師實在不知如何引起學生對睇報紙嘅興趣，諗住股市咁暢旺，香港靠金融食飯，不如講吓財經新聞，起碼財經記者供不應求，學生應該有興趣啩？佢問左丁山意見，左丁山就話，首先要新聞系學生修讀會計與經濟學導論，對呢兩科冇認識，報道財經新聞好難入手。兼職講師諗咗一輪先至話：「不如試吓叫經濟系學生讀新聞採訪好過。」