筆者於9月13日「油價短期居高難下」欄內指，儘管油組增產，油價並沒有因此滑落，反而向上再創新高，難道有「春江鴨」早知美國上周原油、汽油等庫存大幅下降乎？
果然不出所料，根據美國能源局之數字，對上一星期美國原油庫存減少710萬桶，減幅比市場預期的240萬桶多近3倍，而汽油庫存則減少了70萬桶，符合預期。看官，明白油價創新高的原因冇？
庫存勁減，颶風來襲，美元滑落，也只能促使油價一嚐80美元1桶的歷史高位滋味，其後卻無以為繼，似乎力度有點不足。油組增產被庫存勁減抵銷，颶風繞過德薩斯州離去，美元站穩住陣腳，這油價應該回落未？
按筆者估計，暫時仍未。下周二FOMC議息，如果唔減，實俾人鬧到狗血淋頭；若減半厘，豈不打開大門俾隻「狼」（通脹）走入嚟？所以最佳擺平各方之決定，是減0.25厘，會後聲明或提一提能源價格高企，將為通脹帶來風險，如此這般，便可蒙混了過去。
正如筆者所說，難道減半厘就可以扭轉次按問題乎？信心才是根源嘛，何況10年聯邦債券孳息已下降至4.5厘之下！
咁（油價）幾時跌？過埋下星期或會有迹象回落，不過將會甚為緩慢，或要到9月尾10月初才見真章。何出此言？
美庫存大減要補給，被「夾」炒家未冚完倉（見增產仍不跌），颶風季節未過，美國企業未計晒海外盈利條數（美元還須穩中帶弱，才合邏輯），待這些任務完成後，油價可望逐步回落。你估高油價對這耗油量佔全球25%的美國好有利咩？
還有一點加強筆者信心的是，國際能源組織（IEA）降低明年需求預測，由8820萬桶減至8800萬桶，可有啓示？