唔少人都話過，紅綠帽鬍鬚仔乜鬼都出一餐，唔止動作過關同賽車，甚至連運動汁都撈埋，繼以往嘅高爾夫、網球及籃球後，𠵱家連足球都有佢份，真係點到你唔服呢隻Game界長青樹？響下個禮拜《孖寶足球》將登陸日版Wii，有冇諗過點樣用遙控器嚟操隊波？原來想贏嘅話就一定要鬥茅鬥賤，仲要用犀利到痹嘅火燄射球幫人埋單，似足《少林足球》！
文：陳福榮
角色網羅老任名作
既然掛得孖寶個名，咁班登場主將就固然係歷代著名角色啦！瑪利奧、路易、桃公主和耀西擺明係穩膽，加埋奸角諸名庫巴兩父子、華利奧及華路易等，而令人感到驚喜嘅係佢居然連大金剛同食人花都收錄埋，真係堪稱老任人氣角色大雜燴。佢哋每個都有各自嘅超必、「超凡能力」與能力數值，例如兩個水喉佬就屬於平均型，華利奧則係射傳皆精，揀邊個嚟用純粹係睇閣下喜好和成隊波想主攻定主守。事關另外３位支援隊友都係各具特色，龜仔、冬菇仔同鎚仔佬呢班《孖寶》配角能力各有不同，兼且都有自己嘅必殺射門，雖然威力冇主將咁勁，不過有時都可以靠佢偷雞。至於負責守龍門嘅兩邊都會係蜥蜴怪吉利達，平時可能冇乜料到，但喺特定條件下可以硬食對方嘅怒射，始終後面守唔住前面入幾多粒都冇用。
毀天滅地極之誇張
幾年前星爺套《少足》開拓出誇張破壞力嘅球場競技，搞到唔少遊戲都有樣學樣，踢波都要將班對手炒到飛起先安樂。如今呢隻《MarioStrikersCharged》秉承咗呢啲特色，雖然表面上係友誼第一，不過落到場就乜鬼法寶都出齊，你出超必時我又搵頂級門將接實，總之就球來球往滿天閃光，誓要打甩髀為止。因此佢嘅畫面表現手法都幾勁抽吓，同平時我哋見開嘅《孖寶》好唔同咁款。
其實本作係源自GC年代嘅相似遊戲，分別在於畫質大躍進之餘，玩盡個遙控手掣和Nunchuk造出肩撞、剷球與假身等動作，擺脫只用粒Analog桿同圓圈交叉AB掣嚟玩。再加上佢破天荒可以靠一球超必連取6分，只要喺適當時機㩒啱掣就搞掂，所以未到最後一刻落後幾粒仲有得追，大大增添對戰時嘅緊張感。
蕉皮龜殼賤招贏波
隻Game由於係喺細場作賽，實際參與嘅球員數目唔多，每邊只可以派5人應戰。唔計可以發動「超凡能力」同使用超必射球嘅主將，其餘4人分別係3名防守卒仔以及兩隊共通嘅龍門，因此隊長嘅選擇取向就直接反映出玩者係咩Style，想郁得快就揀桃公主，貪大力就用庫巴。除咗一般吼準死角嘅靚絕射門以及超必，其實仲可以玩儲氣抽射和笠死等，但重要性就不及學足《孖寶賽車》嘅道具系統，縱使唔能夠造成直接入波，但至少可以整到對方球員反晒艇，然後單刀直入就變得好Easy；唔單止咁，就連部份球場都設有妨礙措施阻頭阻勢。不過話時話，啲道具咪又係蕉皮、龜殼之類，諗真啲其實都幾悶蛋吓。
網上搵對手操機
講到佢咁過癮，都算係宴請朋友返屋企狂歡嘅恩物之一，只要個個帶齊遙控與Nunchuk就可以整番幾場2對2大戰。當然佢亦奉行老任推崇備至嘅Wi-FiConnection網上對戰系統，只要開咗機並且連上網絡，就可以又簡單又唔使錢咁搵人挑機，仲整埋排名榜俾大家過癮吓。不過唯一條件係必須要由兩部機Link住玩，每部仲要有兩名玩家參賽，到時就話知你哋4條友點分隊法，想3抽1都仲得！話雖如此，根據日本官網所講，來自東京同大阪嘅兩部Wii係可以連到線，但到底做唔做到港日對戰又係另一回事，始終Lag到七彩嘅話，俾你Link得埋都係冇意思啦。
機種：Wii
廠商：任天堂
類型：SPT
人數：1-4人
售價：$358
推出日期：9月20日
查詢：I-Gamer（27253338）
