Twins硬夾兩天王
蔡卓妍：「嗰晚做回歸騷，我哋分別同華仔（左一）、學友（中）佢哋講影合照，最終走嘅時喺門口見到學友，即刻走埋去影，最初學友聽唔到，阿嬌（鍾欣桐）走去箍住佢，咁啱又見到華仔走，所以可以一次過同佢哋一齊影。」阿嬌：「分別同佢哋幾個影唔難，要同四大天王合照就難度高好多，𠵱家同到其中兩個天王影相都好開心喇！」
人物：張學友、劉德華
採訪：楊潔雯、王連連、張俊銘、卓寶花
徐子珊難忘小馬哥
「最難忘係當年自己選港姐，去台灣親善訪問馬英九，記得佢個人好nice，作為一個政治領袖好有魅力同氣派，當年一齊參觀歷史博物館，我要兼負重任，喺好多人面前問佢有關博物館嘅問題，當時係我人生其中一個難忘嘅片段。」
人物：馬英九
袁彩雲意國遇羔羊
「四、五年前，套戲喺意大利上映，當時咁啱我係去意大利同歐洲工作，同朋友去咗個首映禮，同AnthonyHopkins（左二）影咗張合照，佢好nice，嗰時我仲做緊首飾設計，佢仲讚我條頸鏈好靚，大家好簡短打個招呼，AnthonyHopkins係我偶像之一，亦係好戲之人，絕對稱得上係實力派，但𠵱家佢都好少拍戲，可能一年先拍一套。」
人物：AnthonyHopkins（安東尼鶴健士）
古巨基獲美女垂青
「記得前年獲邀出席李英愛喺廣州舉行嘅慈善音樂會，當晚喺後台同佢見面打招呼，繙譯員簡單幫我哋介紹對方。之後李英愛上台被司儀問到最想同邊個中國歌手合作，李英愛竟然講出我個名，令我受寵若驚，真係估唔到，令我好開心，希望未來真係有機會合作到。」
人物：李英愛
