黎姿因胞弟黎嬰的傷勢，身心備受壓力，近月才逐漸復工，前晚她谷胸上陣出席活動，精神奕奕，重現愛美神風采。黎姿表示胞弟的病情好轉，所以才有心情扮靚去ball，她又謂早前到西藏拍劇時出現高山反應，幾乎窒息，有一刻更有死亡接近的感覺，但當她想起弟弟，即時振作面對困境。
黎姿、任達華、劉心悠、容祖兒和關淑怡等前晚齊齊到灣仔出席「FOREVERMARKSparkle美鑽派對」，活動上更雲集全港名模如琦琦、樂基兒和AnaR.等，但全場焦點則落在久未露面的黎姿身上。黎姿月前在胞弟遇上車禍昏迷後全面停工，每日到醫院照料他，心力交瘁，經常愁眉深鎖，更突然暴瘦。黎姿前晚身穿露背Versace黑色晚裝，戴上周大福贊助、共重超過28卡的鑽石首飾，明顯成功增磅，她更谷胸上陣，狀態大勇，面對大批記者包圍及狂影相，露出近月罕有的開懷笑容。
卧床吸氧
獨自面對死神招手
黎姿直認因為黎嬰的病情轉好，始有心情扮靚去ball。記者取笑她身材玲瓏浮凸，「愛美神」重現，黎姿笑而不答，但講到「愛美神」是香港人的集體回憶，她就笑得更開懷，忍不住說：「我肥番啲囉，不過冇計磅數。」
非常風騷的黎姿又透露，剛在西藏拍攝無綫新劇《珠光寶氣》回港，在當地共逗留了7天，她說：「去到6小時後，我就有高山反應，唞唔到氣，正常人氧份指標係90幾，我跌到70，睇軍醫吊鹽水入院，要卧床休息36小時，床頭堆放咗3個氧氣筒，我怕佢爆炸㖭。𠵱家就低山反應，場內太衣香鬢影喇，令我暈暈哋。」她續說：「其實嗰一刻有死亡嘅感覺，個肺好似張開唔到咁，唞唔到氣，嗰刻諗起細佬，我都唔敢打電話畀屋企人，後來好啲我先打畀細佬同佢講，佢𠵱家進步好多，一路一路咁進步。」
日日進步
黎嬰有能力聽電話
黎嬰情況改善，現在能夠聽電話，那能否說話？黎姿說：「未，佢插住喉，遲啲仲有幾個手術要做。」黎姿又謂現時家人與健康最重要，愛情則隨緣，她說：「我希望遇到一段高山反應嘅愛情，係頭暈、唞唔到氣嘅。」此外，提到她的陳年戀人許晉亨早前盛傳與李嘉欣結婚，黎姿表示未有留意，但仍說：「我衷心祝福佢哋。」她又十分識做地為大會宣傳，大讚說：「今日戴咗幾十卡鑽石，個心真係卜卜跳，而且係結合皮草加鑽石，好特別。我一向鍾意鑽石，希望將來可以儲到錢買一粒5卡、足色全美嘅鑽石。希望將來嘅老公可以待我好似鑽石咁，完美寵愛。」
採訪：梁錦雯 攝影：陳順禎
姊弟情深：照顧胞弟瘦了幾圈
黎姿胞弟黎嬰（圖）自5月遇上嚴重車禍後，一直在瑪麗醫院留醫，黎姿也因而暫停所有工作，全力照顧受傷昏迷的黎嬰，為他抹身、剃鬚及換尿片等。
黎姿眼見感情深厚的胞弟生死未卜，瘦了幾圈，且有指她曾一度面臨崩潰狀態，她7月底復工時，其面容略帶憔悴，也有點浮腫。上月中黎嬰情況好轉，終於蘇醒，而且逐漸回復記憶，令黎姿放下心頭大石，近日心情轉好且一直笑逐顏開，繼續拍攝劇集《珠光寶氣》。
話你知：高山症可奪命
黎姿到西藏拍劇出現的高地綜合症（俗稱高山症）其實不是病症，是人體在高海拔地方時急性病理變化的表現及反應，任何年紀或體質人士都可能受影響，通常發生在海拔3,000米或以上地方，反應會因個人體質而異，一般會出現頭痛、頭暈、嘔吐及食慾不振等症狀，嚴重者會肺水腫及腦水腫，可引致死亡。過去曾有不少名人出現高山症，如歌神許冠傑於1986年到尼泊爾拍攝電影《衛斯理傳奇》（圖）便曾傳出患高山症一度昏迷，其後休養了一段時間，近年藝人米雪、陳豪和林嘉欣等也曾先後出現此症狀。
