整容三嬌Freeze成員石詠莉、甄穎珊同陳樂榣，仲有啱啱大修完嘅「A貨祖兒」譚情，雖然呢四個人工索女未必啱香港人口味，但喺外國人眼中，佢哋都係可人兒，所以呢隊整容兵團前日殺去蘭桂坊時，吸引到唔少外籍人士注意。
前日下晝6點鐘，Freeze着住透視裝、tubetop同短裙仔大騷身材，而譚情就着性感低胸衫，佢哋去到老蘭一間酒吧開餐，其間坐喺佢哋隔籬枱嘅兩位外籍中坑不時對佢哋眼望望，冇幾耐大家就傾起上嚟，陳樂榣仲好識冧人，即刻拎出相機，叫對方幫手影合照。
傾足個幾鐘
冇幾耐又有一名比較年輕嘅外籍男士加入，石詠莉、譚情同呢個洋人都不知幾好傾，大家影合照時，前者仲主動搭住年輕洋人膊頭影相，至於甄穎珊同陳樂榣就同原來嗰兩名中坑洋人雞啄唔斷，總之自動分成兩批搵食，各有所好。估唔到呢班整容兵團主動又熱情，同三位洋漢傾咗個幾鐘至捨得拜拜，後尾仲由石詠莉萬歲埋單，佢走時開心得攬住陳樂榣條腰，而譚情就同女助手攬埋一嚿，個個都風騷到爆。
之後整容三嬌轉場，喺中環出席Louvre家具店十周年酒會，同場有貝安琪、陳沛嘉做模特兒，Freeze着上低胸白短裙搶鏡，喺床邊搔首弄姿，吸引記者包圍狂影，三女意猶未盡，再轉到黑色梳化搶鏡，迫喺小梳化影相，石詠莉一時興奮忘形，成個人跣落地下，鬼咁尷尬，佢即時爬起身，以笑遮醜。
