稻香控股（573）噚日開業績記者會，旗下咁多間酒樓食肆，要搞記招，梗唔使畀錢酒店賺，自己一條龍做晒，慳錢之餘仲畀各位傳媒試吓自家出品，做埋宣傳。
咁啱就嚟中秋佳節，主席鍾偉平請大家食月餅，一邊話當年。佢話細個時家貧冇乜嘢食，所以一到中秋節可以大擦一餐就最高興，尤其鍾意食五仁月餅，貪佢夠香口。
唔好成日想當年，人都係向前看好。佢話他日如果退休，就會開間私房菜，連店名都諗埋，叫「客家鍾」，到時鍾意開門就開門，鍾意邊個客就煮畀邊個客食──睇嚟大廚鍾偉平有啲手痕喎。怪唔得，佢話91年到𠵱家都好耐冇揸過隻鑊鏟。不過講到退休，只係噏吓，未有打算。
吹完水，講吓實際業務，稻香旗下嘅食肆種類唔少，潮洲、上海、客家……但仲未有平民化嘅茶餐廳。鍾偉平話，10月喺葵涌會開第一間，喺稻香旗下酒樓隔籬，實行乜客都殺晒，明年初就會喺深圳開多間㖭！