你都有今日喇，史高拉利！呢位外號「大菲」嘅火爆葡萄牙國家隊教練，周三主場被塞爾維亞迫和1:1場歐國盃外圍賽，發爛渣出手打塞爾維亞後衞德古天奴域，嚟緊實被罰坐波監啫！
拳襲德古天奴域
話說主隊葡萄牙11分鐘領先1球，至88分鐘被追平後好心急。補時階段，德古天奴域博懵掟界外球被紅牌罰離場，仲同葡萄牙中場哥利斯馬發生衝突；激到面都青嘅「大菲」好似拳王洛奇咁，一拳樁向對方面部但冇打中，好彩其他球員拉開身高1米85嘅德古天奴域，唔係「大菲」實變柿餅！
「大菲」事後仲未收火，話自己係保護哥利斯馬兼冇掂對方一條毛！仲將矛頭指向德國球證梅克：「對方入波足足越位成2米。」不過，我求大俠睇到個波先彈到保羅費拉拿然後彭達歷先射入。我求大俠唔係針對「大菲」，正如塞爾維亞教練基文廸所講：「輸唔起就唔好玩！」德古天奴域就話會上報塞爾維亞足總，而歐洲足協已喺周四展開調查，睇嚟「大菲」呢次有排煩啦！
其實「大菲」又駛咩咁緊張？雖然連和波蘭（２:２）及塞爾維亞（1:1），現排A組第3，但少打1場，而且A組1、2名嘅波蘭同芬蘭打和咗；加上葡萄牙餘下對手只係阿塞拜疆、哈薩克、阿美利亞同芬蘭，出線唔難喎！06世界盃16強葡萄牙淘汰荷蘭出現4紅16黃場波，「大菲」賽後好招積咁話：「呢啲場面我見得多啦！」唔知今次算唔算老貓燒鬚呢？