鄭大班以前從加拿大回流香港，係人都知，佢現在身為尊貴的議員，攞番香港特區護照，仍然不時返加拿大探訪親友，亦有不少加拿大朋友來港探訪佢。呢日到政府議員辦公室搵佢，見佢同張文光、楊森兩位尊貴議員講：「你哋做乜要搵陳方安生競選，我反對㗎！」果然第二日就見到佢篇文章在《信報》炮轟泛民，做事劍及履及，甚有效率。不過咁喎，《蘋果日報》搵港大做民意調查，陳太拋離葉太二十個百分點，如果調查可信，泛民唔支持陳太上場，豈非自動棄權？派甘乃威上陣嘅話，等於捉棋讓足車馬炮。
唔講政治咯，鄭大班話特區政府各機關啲辦事效率好高，佢啲回流加拿大朋友對佢講：「香港入境處、運輸署啲效率高到冇得彈，與加拿大有天與地之分別。」去旅行嘅朋友都知道，英美澳洲東南亞日本各地之入境，零舍麻煩，排隊排到你怕，邊度有香港機場入境咁快捷妥當㗎。本地人出入境，全部自動化，外國人見到，難以置信。左丁山一位舊老闆係印度人，有香港長期居留身份證，九七前搬咗去新加坡，經常回港公幹，前年特登返嚟換領智能身份證，理由係出入境好容易，佢直情讚到香港入境處天上有地下無。
最近一班商界朋友應外國領事之請，組中東訪問團，其中一站係伊朗，因伊朗好少人去過，各人爭相報名，三十人團一早爆滿。問題嚟嘞，內裏有人持加拿大、英國、澳洲護照，去伊朗方唔方便呀？聰明人立即指出：「各位外國人原是香港居民，不如你哋去申領一個香港特區護照，特區護照有一百三十幾個國家承認，新護照聽講設計精密美觀，去攞番個啦。去伊朗冇蝕底。」呢班朋友深然其說，呢幾日就會去申請。
去伊朗有乜可以遊覽，左丁山烏垂垂，𠵱家潮流係去東歐，尤其是到布拉格與聖彼得堡遊覽。賓架Ｒ啱啱去完返歸，對布拉格讚不絕口，指布達佩斯不敢恭維。布拉格有人文氣氛，畢竟一個選過劇作家哈維爾做總統嘅國家，具深厚文化傳統，唔會差得去邊。