有線首部嘅劇集《補習天后》開拍以嚟是非多多，有傳葉璇俾梁思浩佢哋杯葛，不過前晚套劇喺尖沙嘴舉行煞科宴，葉璇同梁思浩突然變成好友，問梁思浩點解突然同葉璇做咗好友，佢話：「大家對咗兩個月，認識深咗，咁人哋對我好，我咪對人好囉，可能以前我講咗一句令佢嬲咗我。」問佢嗰句說話係乜，思浩話：「咪叫佢阿艇囉，我以為大家咁叫係花名，點知佢嬲啫。」
不過葉璇就話絕對冇咁嘅事，大家從來冇唔妥，問佢係咪因為思浩叫佢做阿艇而嬲咗對方，佢話：「我點會介意，因為個名係我最欣賞嘅監製潘嘉德幫我改，我好多朋友都叫我阿艇。」
前晚要席上演員大爆私隱，肥媽就大爆戲中有個女演員每日化妝四個鐘，補妝又補半個鐘，而呢個女藝人姓陳，登時哄堂大笑，有工作人員更大聲爆出：「陳雅倫。」肥媽聞言話：「你講㗎咋，唔係我講㗎。」
自辯冇遲到
而有線嘅公關臨尾仲話：「聽啲劇務講，肥媽同陳雅倫唔啱，有肥媽到，陳雅倫就唔到。」
前晚有事缺席煞科宴嘅陳雅倫，噚日就着住低胸裝到銅鑼灣出席活動，對於肥媽大爆佢遲到兼不停補妝，佢話：「佢今次開玩笑都開得好大，可能佢係想考吓我對傳媒嘅EQ，呢十幾年我同佢冇任何工作碰過面，我同佢喺劇入面根本連一面之緣都冇，如果有問題監製同導演都會講，我根本就冇遲到過。」
