陳苑淇對夏天的來臨可謂又愛又恨，每年一到夏季她就心思思想到沙灘享受日光浴，不過卻擔心曬黑了不好看，所以只好阿Q精神，邊曬邊狂搽太陽油，最後奉獻的只是一身汗水。她更有意到天體沙灘見識一下，但只限欣賞，卻沒有膽量參與，她坦言因為不喜歡空蕩蕩的感覺，而且若被蚊子咬到敏感部位就認真難堪了。
擁有一雙43吋長腿的陳苑淇（Jolie）每到夏天就最愛穿上熱褲短裙，因為香港炎炎的夏日認真難受，所以Jolie平日上街亦不介意以小背心及短褲上陣，她笑言對夏天可謂又愛又恨。
最怕曬黑
由於Jolie十分熱愛曬太陽，但又怕變成「黑炭頭」，所以每次到沙灘曬太陽，Jolie就會發揮她的阿Q精神，她笑說：「為免曬得太黑上鏡唔好睇，我就會一邊曬一邊狂搽太陽油，仲一定會搽防曬度最高嘅太陽油，始終如果太黑上鏡會唔好睇，所以每次曬完之後都只限過吓癮出一身汗咋。」
Jolie又坦言一直心思思想到外國的天體沙灘見識一番，問到她是否夠膽量裸曬，Jolie即耍手擰頭說：「真係唔夠膽，因為自己唔鍾意冇衫着嗰種空蕩蕩嘅感覺，感覺好似好怪咁，而且沙灘成日好多蚊，自己最擔心就係俾啲蚊咬到敏感位置，咁就好鬼尷尬啦。不過我想去都因為想昅吓外國女仔嘅身形，反而昅全裸嘅男仔就冇興趣，因為有欠美觀呢。」
學會獨立
此外，Jolie自從去年和經理人「寶號」結束賓主關係後，前路一直未明朗，不過日前她就透露與一間公司正在洽談當中，而且已傾到七七八八，現階段只欠傾合約詳細內容，所以Jolie相信未來兩個月她就會有個「好歸宿」了，她說：「其實之前雖然冇經理人公司，但係自己都會接工作做，所以收入方面就冇乜大影響，但係當然有間公司就好啲，起碼好多嘢都會有人照顧，唔使自己理，但係之前合約件事反而令到自己更加獨立，呢件都算係好事啦。」
採訪：駱華齡
攝影：陳慧安
髮型：PatrickofO4
