港股昨日有479隻正股上升，478隻正股下跌，但係恒指就升咗361點，仲創埋新高，咁大家應該明白所謂「大市」係乜嘢，就係恒指成份股嘅表現，仲要係大隻嗰啲。
中移動（941）加地產股加埋幾隻國內保險股，掂晒，炒高幾隻股份，恒指就可以直撲25000關，𠵱家個遊戲就係咁玩，第日要插個市，掉轉做就得嘞？
花旗嗰邊炒減息炒到癲，股市升得好有勢，喺咪真係減就唔知，但係香港銀行公會開完會就預花旗減1/4厘至半厘，仲話如果拆息落番啲，有可能跟減息。
國內呢？通脹咁勁，市場預咗佢加息，昨日收市之後，人行宣佈加息0.27厘，算係好溫和，並冇加雙倍，國企股昨日炒咗上嚟，下禮拜一應該可以繼續炒上去。
地產股升咗咁多，可能會喺花旗議息之前唞吓，國內煤炭股可以繼續留意，尤其係隻申請緊A股IPO嘅神華（1088），昨日破40元，扯上去可以好高，另外啱啱轉強勢嘅保險股亦有值博率，睇實呢幾瓣，唔會錯得去邊。
平保C輪5671：平保（2318）昨收85.75元，升吓升吓唔經唔覺又逼近100元，近排多咗好多隻「紅底股」，基金最鍾意炒呢啲股，平保變「紅底股」睇怕只係時間嘅問題，短線升破88元，睇96元，可以買啲平保C輪5671，昨收2.22元，槓桿率3.9倍（有效3.2倍），正股升上96元，5671應該喺3.10元樓上，正股跌穿80元止蝕。