有一排冇露面嘅花旗集團前大班陳子政（TC），自從今年4月退休後，就享受佢嘅悠長假期，噚日「公益金服飾日」開展儀式，見佢蒲頭，但之前青靚白淨、西裝筆挺嘅TC，轉咗一身夏老威造型。一見到熟朋友就即刻指住自己件衫話：「喺夏威夷買㗎。」
原來佢大女喺美國大學畢業，一家人出席畢業禮，順便玩番轉，喺夏威夷留咗成個禮拜。咁唞夠未？有冇新大計？TC話再休息吓先，未諗做乜嘢，仲話如果有計劃，一定知會大家喎。
噚日個活動建議嘉賓着特別服飾襯番主題，TC雖然着咗件夏老威，但都唔夠一身監犯造型嘅余錦基搶鏡。佢話件衫係舊年域多利監獄關閉時買嚟留念嘅，估唔到有機會着。恒生（011）常務董事兼副行政總裁潘仲賢都唔執輸，一套飲宴着嘅西裝加埋腰封，但就襯件Polo恤，佢話呢個騎呢着法容易變身，日頭除咗件褸就隨便啲，夜晚去飲加個煲呔變番隆重。