在無綫重頭劇《歲月風雲》前半段，「癡心情長劍」長萍對華文翰死心塌地的愛情，更交織着整個故事。其實由陳美琪飾演的衞長萍，正因對華文翰的癡心，令「愛之深、恨之切」的她步上殺人之路。
已經離開娛樂圈7年的陳美琪，其實早已與丈夫子女移居上海，再次接演劇集，除因監製潘嘉德不斷游說外，也因丈夫與前妻所生的兒子的一句話，她笑說：「本來老公怕我辛苦唔畀接㗎，但係個仔同我講，佢話自己同細妹都大個唔使照顧喇，我去拍劇的話，就唔會日日都千篇一律咁悶，生命多番啲顏色。老公係聽到阿仔Ivan咁講先OK咋。」
由陳美琪飾演的衞長萍個性柔韌堅毅，可惜命途坎坷，先是華文翰（劉松仁飾）離開了自己，捱過文革10年後，移民加拿大仍逃不過被付託終身的丈夫虐打，根本就是一個悲劇人物。陳美琪卻為長萍辯護說：「呢個女人好善良，直頭係柔情似水加一往情深。」
至死緊握愛人手
呷着橙汁、遙望已封閉的皇后碼頭，陳美琪感慨地強調說：「呢個角色乜都為人着想先，佢都係劇中一個最關鍵人物，因為佢令其他角色都引起矛盾，仲因為咁而引發大報復。」
談到對《歲》劇最深刻的一幕，陳美琪說：「最深刻係文翰探監時，終於知道長萍嘅心意，仲講咗一句『我唔會再畀你受委屈』，仲帶埋《三套車》（片尾曲）嘅CD去畀長萍，其實呢隻歌代表我哋三個（長萍、文翰、文鴻）嘅感情同經歷。雖然長萍知道文鴻（廖京生飾）好愛自己，佢哋都一齊經歷過苦難（指文革），但係到死嗰一刻，佢都係拖住文翰隻手，只係當文鴻係死黨。」
遷居內地似探險
身為工商管理碩士的陳美琪其實個性如大細路，與長萍的沉着冷靜完全相反，她說：「初初搬去上海，我同老公仲有兩個仔女Ivan同Vina都唔熟路，出去就好似4個人一齊去探險咁，乜都覺得好新鮮，仲令我哋一家人更加親密。」
採訪：藍文浩
攝影：陳順禎
場地提供：亮明居
服裝提供：DonnaKaran
