八月十一日英超開鑼，鍾意睇足球嘅朋友，無不即時申請NOTV。我位朋友知道可以安裝NOTV，咁梗係即時申請啦！
唔知係咪太多人安裝，最終等到英超開鑼先裝到，但好景不常，裝機後三日，就發現接收有問題，整好隔兩日又再壞過，無畫面無聲，作為客仔當然搵NOTV客戶服務部，再轉駁到支援部，點知等咗超過半個鐘都無人接聽，客戶服務部就要求留姓名及聯絡電話，最後場波睇完都仲未有人覆。惟有再致電客戶服務部，今次終於有人聽，接聽位職員話係接收器有問題，要安排師傅上門換機，裝唔夠一星期就要換機自然令人勞氣，爭論了一陣，朋友突然聽見有人大聲爆粗「戇XX」，咁即時查問爆粗職員嘅姓名，嗰位職員點都唔肯講。
老實講，做客戶服務嘅，點都會遇着麻煩客人，但即時爆粗鬧客，真係太過份。加上NO係一間大機構，理應有訓練職員點樣面對客人，若果NO嘅職員做得辛苦嘅，咪唔好做囉！唔通大機構就有權無禮貌對待客人咩？
文：盧曹珠