「股壇長毛」DavidWebb呢排幾乎隔日發炮，噚日又有新嘢鋪上網。嘩，驚人消息，Webb引述消息人士話，政府研究緊食物價格調節機制，等食物價格可跟隨通脹加減，政府又計劃入股持有惠康同百佳嘅牛奶公司同和黃（013），目的係發展無豬肉伊斯蘭式超級市場，更大有可能將兩大超市合併。
研究食物價格調節機制
Webb仲引述財政司司長曾俊華話：「𠵱家啲豬肉太過昂貴，有需要將豬肉剔除喺消費物價之外，對發展伊斯蘭式超市大有幫助。」除咗食品，Webb話政府下一個目標係電力市場，橫掂家吓透過外滙基金都揸住中電（002）同港燈（006）咯。
睇到呢度，你同華華都應該有同一反應──長毛又玩嘢！首先，政府冇理由走去買間新加坡上市嘅牛奶公司；再者，外滙基金買股要符合規定的目標，即係要同維持香港國際金融中心地位有關，唔係隨便可以買。
Webb玩嘢唔係冇前科，今年愚人節，佢喺網站度都發表過一篇文章，話製造核彈原料嘅ChinaPlutoniumInternationalHoldingsLtd.招股反應熱烈，仲有多位香港富豪做策略投資者，好多人睇到一頭霧水，後尾先知俾佢「老點」。
不過，愚人節過咗咁耐，「哈佬喂」就仲有成個月先到，嚇鬼都唔使咁早，呢段「消息」，應該唔係同網友開玩笑──政府上個禮拜五增持港交所（388），「長毛」隨即炮轟，今次呢篇「報道」，擺明暗寸政府。華華估長毛想講嘅係：「政府咁鍾意乜都管，買起埋兩大超市同電力公司吖，笨！」
[email protected]
Webb玩嘢事件簿
叫得股壇長毛，明玩暗串Webb最耍家，華華搵咗幾件出嚟
07年8月31日：新任財經事務及庫務局局長陳家強代表政府入地鐵（066）董事局，Webb即「翻舊賬」，話陳局長喺科大教書時，曾「支持地鐵有車費自主權」。
07年7月26日（圖）：Webb喺網站上載先科前主席黃創光張相，仲大隻字寫明「廉署通緝」（WantedByICAC）。
07年4月１日：佢介紹咗隻新股，叫ChinaPlutoniumInternationalHoldingsLtd.（簡稱SinoPluto）上市編號2390，總部喺廣東省大亞灣，公司嘅行政總裁叫AprilFu。
01年4月1日：Webb話收到料，港交所（388）會同香港賽馬會合併，新公司叫HKJOX，交易時間縮到T+20分鐘。
00年4月1日：Webb話，包括證監會在內所有政府部門，會注資到一家叫eGovHK.com嘅嘢度，然後將呢件嘢喺創業板掛牌同全球發售。