噚日係哥哥張國榮51歲冥壽，佢一班來自中、港、台、日本、星、馬同德國嘅長情歌迷前晚11點喺星光大道哥哥粒星度，搞倒數活動悼念，點知遇着大雨，到11點45分儀式開始時，雨就停咗，佢哋好順利咁進行倒數，倒數完仲唱兩次生日歌、《月亮代表我的心》同《追》等歌曲，溫馨之極，歌迷黎小姐話今年悼念活動低調進行，等明年哥哥逝世五周年先大搞。
生日會籌經費
噚日都有各地歌迷去哥哥故居同文華酒店獻花送禮致意，其中有歌迷好有心思咁送咗親手繡嘅咕𠱸同相架去，哥哥摯友唐鶴德（唐唐）都叫工人出嚟收晒入去，有歌迷話其實過咗咁多年，佢哋都冇乜哀傷感覺，只係習慣每年兩次悼念偶像。哥哥前助手Kenneth、陳淑芬、蘇施黃就去咗搵唐鶴德相聚。
到噚晚六點，一班歌迷又喺尖沙嘴富豪酒店搞生日會，筵開26圍，有逾300人出席，每人收380元，所有收入扣除成本後，會作為12月喺日本搞《霸王別姬》圖片展嘅經費，歌迷會話希望籌到六位數字。
