由李安執導的《色，戒》勇奪威尼斯影展最高榮譽金獅獎，可惜兩位主角梁朝偉及湯唯卻未能染指最佳男、女主角。偉仔昨日由威尼斯經香港轉機到北京繼續拍攝新片《赤壁》，他特別在香港機場接受傳媒訪問，提到《色，戒》勇奪金獅獎，偉仔自言已與有榮焉，又指逼真的情慾鏡頭令電影錦上添花。
以輕便打扮現身的梁朝偉，昨日12時許在香港機場匆匆停留接受本地傳媒訪問，吸引不少遊客爭相合照，非常受歡迎。提到《色，戒》勇奪威尼斯影展最高榮譽金獅獎，偉仔說：「我哋所有人都好開心同興奮，今次拍攝嘅工作人員算係夢幻組合，有美國嘅工作人員，又有西班牙嘅攝影師，當然仲有香港嘅工作人員，佢哋做起嘢上嚟一啲都唔輸蝕，好開心我有份參與，攞到金獅係最完美嘅結果。」
未有睇畢彼特新片
雖然《色，戒》揚威威尼斯影展，但偉仔未能獲得最佳男主角獎，對此他說：「如果演員唔夠好嘅話都唔會成為最佳電影啦，同埋我都唔會懷疑自己嘅能力。」偉仔透露由於在影展期間不斷接受海外傳媒專訪，所以未有時間欣賞最佳男主角畢彼特（BradPitt）的作品。
《色，戒》最引人注目的情慾戲成為今年影展的熱門話題，偉仔說：「呢幾場嘅戲份好重要，套戲都唔係以此嚟製造話題，我係以藝術表演角度嚟做好佢，唔可以對自己太多掣肘，如果唔係就得三樣嘢，一就係太保護自己，二就係對工作人員唔信任，三就係唔肯定自己做到。」
嘉玲義無反顧支持
近日有消息指偉仔與湯唯的情慾戲是「打真軍」，他聞言即笑說：「咁即係成功咗啦，做演員梗係希望越真越好，lovescene一定係咁，就算喊都一樣唔可以假。」那麼嘉玲對此有何反應？他笑說：「佢冇所謂喎，我25年演藝生涯以嚟，佢同家人都義無反顧咁支持我。」
因尺度所限，《色，戒》在內地上映時將會被剪掉30分鐘片段，偉仔無奈地說：「內地環境同香港唔同，佢哋戲院又冇分級，雖然部戲唔係拍畀小朋友睇，但係都需要某程度上嘅刪剪。」
採訪、攝影：藍文浩
