我阿Deep有時都不得不佩服一班網友，咁有閒情逸致同高超嘅photoshop技巧，經常將一班荷李活名人紅星惡搞一番。阿Deep最近又喺網上搵到大批名人惡搞相，無論係型男尊尼狄普（JohnnyDepp）定係樂壇天后麥當娜（Madonna），就連我哋嘅成龍大哥都不能倖免，今次手痕網友就將佢哋複製，搞到個個有個孖生細佬妹。
斷背積自攬
貴為樂壇天后嘅娜姐雖然已經49歲，佢嘅超凡舞技早獲歌迷公認，但網友嫌未夠喉，於是複製多個娜姐一齊跳鋼管舞，一個勁拗腰，一個就好輕盈咁踩住另一個跳舞。
型男尊尼就一臉陶醉彈琴，另一複製尊尼就坐喺度靜心聽歌。至於成龍大哥喺網友手下，忽然多咗個孖生細佬，當成龍擺出招牌V字甫士時，複製成龍就喺腋下伸出雙手搞搞震，好似想唧佢咁款。《斷背山》（BrokebackMountain）男星積嘉倫賀（JakeGyllenhaal）就自己攬自己，曖昧又搞笑。
網址： http://www.worth1000.com/cache/gallery/contestcache.asp?contest_id=11869&display=photoshop
版主：網盜王尊尼Deep
本欄逢周一至五刊出